काठमाडौं । प्रधानमन्त्री पुष्पकमल दाहाल प्रचण्डले मन्त्रिपरिषद् पुनर्गठन गरेका छन् । १० दलीय गठबन्धनका दलहरुलाई समेटेर मन्त्रिपरिषद् पुनर्गठन गरेका हन् । यद्यपि, मन्त्रिपरिषद्ले पूर्णता भने पाएको छैन ।
प्रधानमन्त्रीको सचिवालयले जनाएअनुसार राष्ट्रपति कार्यालयमा २१ जना मन्त्रीको नाम पठाइएको छ ।
आठ मन्त्री पाएको नेपाली कांग्रेसले चार जनाको मात्रै नाम प्रधानमन्त्रीलाई दिएको छ । आन्तरिक विवाद भएपछि कांग्रेसले अन्यको नाम नपठाएको हो । कांग्रेसले उपसभापति पूर्णबहादुर खड्काको नेतृत्वमा मन्त्रिहरुको नाम पठाएको छ ।
कांग्रेसबाट खड्कासहित डा. प्रकाशशरण महत, रमेश रिजाल र सीता गुरुङ मन्त्री बन्दैछन् । खड्का उपप्रधानसहित रक्षामन्त्री बन्दैछन् भने महत अर्थ, रिजाल उद्योग र गुरुङ सहरी विकासमन्त्री तय भएको छ ।
यसैगरी, माओवादी केन्द्रबाट उपमहासचिव शक्ति बस्नेत पनि मन्त्री बन्दैछन् । बस्नेतले उर्जा, जलस्रोत तथा सिंचाइ मन्त्रालयको जिम्मेवारी पाएका छन् ।
यसअघि नै मन्त्री बनिसकेका नारायणकाजी श्रेष्ठको मन्त्रालय फेरिएको छ । उनी भौतिकबाट गृह मन्त्रालयको जिम्मेवारीमा पुगेका छन् । रेखा शर्माले सञ्चार तथा सूचना प्रविधि मन्त्रालय, पर्यटनमा सुदन किराती र संघीय प्रशासनमा अमनलाल मोदीले निरन्तरता पाएका छन् ।
एकीकृत समाजवादीबाट बेदुराम भुसाल र प्रकाश ज्वाला मन्त्री बन्दैछन् । भुसालले कृषि मन्त्रालयको जिम्मेवारी पाएका छन् भने ज्वालाले भौतिक पूर्वाधार मन्त्रीको जिम्मेवारी पाएका छन् ।
यसैगरी, जनता समाजवादी पार्टी ९जसपा०को सिफारिसमा अशोक राई शिक्षा विज्ञान तथा प्रविधिमन्त्री भएका छन् । जसपाले दुई मन्त्रालय पाएको भएपनि एक जनाको मात्रै नाम पठाएको छ ।
लोकतान्त्रिक समाजवादी पार्टीबाट शरदसिंह भण्डारी श्रम तथा रोजगार र नागरिक उन्मुक्ति पार्टीकी अध्यक्ष रञ्जिता श्रेष्ठ भूमि व्यवस्था, सहकारी तथा गरिबी निवारणमन्त्री भएका छन् ।
माओवादीको चुनाव चिन्हबाट लडेको नेपाल समाजवादी पार्टी (नेसपा)ले पनि मन्त्री पाएको छ । नेसपाबाट महिन्द्र राय यादव महिला बालबालिका तथा जेष्ठ नागरिक मन्त्री बनेका छन् ।
पुस १० देखि यता सातौं पटक मन्त्रिपरिषद् पुनर्गठन गरेका प्रधानमन्त्री प्रचण्डले यसपटक पनि पूर्णं मन्त्रिपरिषद् पूनर्गठन गर्न सकेनन् । कांग्रेस र जसपाले पूर्णं नाम नपाठएको कारण थप पाँच मन्त्रालय रिक्त छन् ।
वि.सं.२०७९ चैत १७ शुक्रवार १४:११ मा प्रकाशित
