हामी सबैकाे संसारन्यूज

२७ चैत, काठमाडौं । नेपाल सरकार गृह मन्त्रालय, राष्ट्रिय परिचयपत्र तथा पञ्जीकरण विभागले एकल महिलाबाट जन्मेको र पितृत्वको ठेगान नलागेको बच्चाको आमाको थर राखेर जन्मदर्ताको व्यवस्थासहित परिपत्र गरेको छ ।

यसअघि चैत्र २२ को निर्णयमा आधारित परिपत्रमा यस्ता बच्चाको मावलीको थर राखेर जन्मदर्ता गर्न पाउने भनि गरेको व्यवस्थामा आलोचना भएपछि राष्ट्रिय परिचयपत्र तथा पञ्जीकरण विभागले चैत्र २३ को परिपत्रलाई सच्याएर नयाँ परिपत्र जारी गरेको हो ।

केन्द्रीय पञ्जिकाधिकारी रजिष्टार समेत रहेका सो बिभागका महानिर्देशक रुद्रप्रसाद पण्डितद्वारा चैत्र २६ गते स्थानीय तहका ६७४३ वडालाई सहजता र एकरुपताका लागि जारी गरिएको नयाँ परिपत्रमा भनिएको छ, ‘एकल महिलाबाट जन्म भएको तर पितृत्वको ठेगाान नलागेको बच्चाको जन्मदर्ता गर्दा आमाको थर र स्थायी ठेगाना राखी जन्मदर्ता गरिदिने ।’

विभागले जारी गरेको नया परिपत्रका अनुसार विवाहअघि बच्चा जन्माएकी एकल महिलाले पछि विवाह गरी पतिको ठेगानामा सँगै बसेको अवस्थामा आमा सूचक भई बच्चा जन्मँदा आमाको थर राखी हालको स्थायी ठेगानामा जन्मदर्ता गर्न पाइने छ । तर सो बच्चा मावलीमा बसेको भए मावलीकै ठेगानामा जन्मदर्ता गरिदिन भनिएको छ । साथै बच्चाको जन्मदर्ता भइसकेपछि बाबु पत्ता लागेमा पुरानो जन्मदर्ता रद्ध गरी बाबुको ठेगानाबाट वा आमा वा दुवैको थर राखी नयाँ जन्मदर्ता गर्न सकिने विभागको परिपत्रमा उल्लेख छ ।

बिभागको परीपत्रले नेपालभित्र फेला परेको पितृत्व र मातृत्वको ठेगान नभएको बच्चाको हकमा कुनै पनि परिवार नभएको प्रमाणित भए कानुन बमोजिमको संरक्षकले दिएको ठेगाना, नाम थर राखी जन्मदर्ता गरिदिन र बाबुआमाको सम्बन्ध विच्छेद भई आमासँग रहने छोराछोरीको जन्मदर्ता बाबुको स्थायी ठेगानामा नभएको भए आमाको स्थायी ठेगानामा जन्म दर्ता हुने ब्यबस्थाकाे प्रष्ट बोलेको छ । यसैगरी कारागारमा जन्मिएका बच्चाका सम्बन्धमा सम्बन्धित व्यक्तिको स्थायी ठेगाना रहेको वडा कार्यालयमा बच्चाको जन्मदर्ता गरिदिन पनि भनिएको छ ।

#BirthCitizenshipNepal