५ वैशाख, भीमदत्तनगर । राष्ट्रिय प्रजातन्त्र पार्टीका अध्यक्ष कमल थापाले मुलुक धर्मनिरपेक्ष राष्ट्र घोषणापछि धर्म परिवर्तन गराउने काम भइरहेकामा चिन्ता व्यक्त गर्नुभएको छ ।
कञ्चनपुरको भीमदत्तनगरमा आज आयोजित महाकाली अञ्चलस्तरीय चुनावी सभालाई सम्बोधन गर्दै नेता थापाले आगामी स्थानीय तहको निर्वाचनमा आफ्नो पार्टी विजयी भएका नगर र गाउँपालिकामा धर्म परिवर्तन गराउने कार्य निषेध गरिने बताउनुभयो ।
उहाँले यही वैशाख ३१ गते हुने निर्वाचनमा मुलुकको वर्तमान अवस्थालाई समीक्षा गरेर मतदान गर्न आग्रह गर्दै भन्नुभयो–‘निर्वाचन जितेको ठाउँमा मावि तहसम्मको अध्ययन निःशुःल्कदेखि बाल विवाह र बहुविवाहमा समेत प्रतिबन्ध लगाइनेछ ।”
उपप्रधानमन्त्री एवं सङ्घीय मामिला तथा स्थानीय विकासमन्त्री थापाले मुलुक गम्भीर सङ्क्रमणबाट ग्रसित रहेकाले त्यसको निदानका लागि रोगको कारण खोजेर उपचार खोज्नुपर्नेमा जोड दिनुभयो ।
सभामा राप्रपाका महामन्त्री जयन्त चन्दले स्थानीय तहको निर्वाचनलाई राप्रपाले आफ्ना माग स्थापित गराउने अवसरमा रुपमा लिएको बताउँदै शान्ति र स्थायित्वका साथै संविधान कार्यान्वयनका लागि पार्टी सरकारमा गएको स्पष्ट गर्नुभयो ।
––––––
वि.सं.२०७४ वैशाख ५ मंगलवार ०१:४५ मा प्रकाशित