हामी सबैकाे संसारन्यूज

काठमाडौैं । विश्वभक्त दुलाल (आहुति) नेतृत्वको वैज्ञानिक समाजवादी कम्युनिस्ट पार्टी विभाजित भएको छ । आहुतिसहित पाँच जना रहेको पार्टीको केन्द्रीय कार्यालयका सदस्य आशिष लिम्बुको नेतृत्वमा केन्द्रीय समितिका २३ जनाले उक्त पार्टीबाट विद्रोह गरेका हुन् ।

पार्टीले लिएको नीति द्वैद र भ्रमपूर्ण रहेको आरोप लगाउँदै लिम्बुको नेतृत्वमा पार्टी विभाजित बनेको हो । विभाजित समूहले सोमबार नै वैज्ञानिक समाजवादी मोर्चाको घोषणा गरेका छन् ।

“त्यो दस्तावेजलाई क्रान्तिकारी बनाइनु पर्दछ भनी पटक–पटक बैठकहरूमा राख्दा उल्टै प्रतिक्रान्तिकारी कित्तामा लैजाने योजनाहरू मात्र भएका कारण हामी क्रान्तिकारी कमरेडहरूले आजको मितिदेखि वैज्ञानिक समाजवादी कम्युनिस्ट पार्टी नेपालसँगको सम्बन्ध विच्छेद गरेको घोषणा गर्दछौँ”, संयोजक आशिष लिम्बु र प्रवक्ता डि.बि. सर्वश्रेष्ठले जारी गरेको विज्ञप्तिमा भनिएको छ ।

राजनैतिक, वैचारिक र सैद्धान्तिक मतभेद बढ्दै जानु, जनयुद्धको भावना विपरित जानु र अपमान गर्नु, संघीयताप्रतिको दृष्टिकोण बदल्दै जानु र प्रदेशहरू खारेज गर्दै जानुले आफू पार्टीबाट बाहिरिएको उनीहरुको तर्क छ ।