हामी सबैकाे संसारन्यूज

काठमाडौं । प्रधानमन्त्री पुष्पकमल दाहाल ‘प्रचण्ड’ले भ्रष्टाचार र बेथितिविरुद्ध अभियान छेडिएको बताएका छन् । प्रधानमन्त्रीले विकृतिविरुद्धको यो लडाइँमा राजनीतिक दल, सांसद र आम जनताको सहयोग मागेका छन् ।

बुधबार बसेको प्रतिनिधिसभाको बैठकमा बोल्दै उनले भनेका छन्, “वर्षौंदेखि विकृतिको डंगुर सफा गर्ने यो लडाइँमा मलाई सदन र जनताको अझ धेरै समर्थनको आवश्यकता रहेको महसुस गरेको छु, यो लडाइँमा मलाई सदनको पनि र आम जनताको पनि अझ ठूलो हौसला र समर्थन प्राप्त हुने विश्वास गरेको छु, कुनै पनि मूल्यमा विकृतिका विरुद्धको यो लडाइँ अगाडि बढाइनेछ ।”

विकृतिविरुद्ध सरकारले छेडेको अभियानले लोकतन्त्रको सर्वोच्चतालाई कायम गरेको बताए । उनले उच्च पदस्थ कानुनभन्दा माथि हुन्छन् भन्ने मान्यता अन्त्य भएको बताए ।

“नक्कली भुटानी शरणार्थी प्रकरण सरकारले गरेको सबैभन्दा ठूलो अनुसन्धान हो, यो सफल अनुसन्धानबाट कानुनको सर्वोच्चता मात्रै कायम गरेको छैन, लोकतन्त्रको सर्वोच्चता पनि स्थापित भएको छ”, प्रधानमन्त्रीले भने, “लोकतन्त्रभित्र देखा पर्ने समस्याको समाधान पनि लोकतन्त्रमा नै हुन्छ भन्ने यसपटक राम्रोसँग स्थापित भएको छ, उच्च पदस्थ र देशको एउटा वर्ग कानुनभन्दा माथि छ भन्ने निराशावादी मान्यता गलत प्रमाणित हुँदै गएको छ ।”