हामी सबैकाे संसारन्यूज

मिरा ज्ञवाली (आस्था), रुपन्देही

भिरेर हिउँको सपक्क फेटा सधैँ बसेको छ देश मेरो
पहाड पर्वत नदी र नाला गगन खुलेको छ देश मेरो

अपूर्व खानी जडीबुटीको छ हेर भण्डार देशभित्रै
नसक्दा चिन्न छ खेर जाँदै झनै दुखेको छ देश मेरो

अनेक जाति अनेक भाषा छ एकताको मिसाल सुन्दर
नवीन संस्कार भेषभूषा सबै अटेको छ देश मेरो

भएर हाम्रा युवा बिदेशी छ खेत बाँझो फलेन अन्न
विकास पथमा गरेर अल्छी सधैँ झुकेको छ देश मेरो

फुलेर लाली गुराँस वनमा छ अप्सराझैँ असाध्य सुन्दर
बलेर दीपक सबै मुलुकको नजर खिचेको छ देश मेरो ।

बहर : जमिल मुसम्मन सालिम
वजन : १२१२२ १२१२२ १२१२२ १२१२२
काफिया : एको
रदिफ : छ देश मेरो
अभ्यास : परिश्रमी पाठशाला (बहर–छन्दशाला)