हामी सबैकाे संसारन्यूज

झापा । झापाको कमल गाउँपालिकामा बस र टिपर एकापसमा ठोक्किँदा २१ यात्रु घाइते भएका छन् । पूर्वपश्चिम राजमार्गअन्तर्गत कमल-४ मा मङ्गलवार पूर्वबाट पश्चिमतर्फ आउँदै गरेको बा ३ ख २१६६ न.को टिपर र विपरीत दिशातर्फबाट जाँदै गरेको को १ ख ५०८७ न.को यात्रुवाहक बस एकापसमा ठक्कर खाएर दुर्घटना भएको  जिल्ला प्रहरी कार्यालय झापाले जनाएको छ ।

दुर्घटनामा परी बसमा सवार २१ जना  यात्रु घाइते भएको जिल्ला प्रहरी कार्यालय झापाका प्रवक्ता प्रहरी नायब उपरीक्षक कृष्ण चन्दले जानकारी दिए । घाइतेमध्ये तीनको अवस्था गम्भीर रहेको प्रहरीले जनाएको छ । घाइतेहरू दमकस्थित दमक रिसर्च सेन्टर अस्पताल र लाइफलाइन अस्पताल दमकमा उपचार भइरहेको छ ।

अवस्था गम्भीर रहेकालाई दमकमा सामान्य उपचारपछि थप उपचारका लागि बिर्तामोडस्थित विएण्डसी अस्पताल र विराटनगरस्थित न्यूरो अस्पताल लगिएको प्रवक्ता चन्दले जानकारी दिए ।

बस चालक उदयपुरको त्रियुगा नगरपालिका-३ का ४५ वर्षीय अशोक बोट र टिपर चालक धनुषाको गणेशमान नगरपालिका–५ का ३४ वर्षीय शेरबहादुर राईलाई इलाका प्रहरी कार्यालय दमकले नियन्त्रणमा लिएको छ ।