हामी सबैकाे संसारन्यूज

गणेश लोहनी,काठमाडौं

१.
केहि गर्ने अठोट् बोकि मैदानमा आएपछि
माटोसँग मुटु जोडि गाढा माया लाएपछि
अस्मिताको चिन्ता धेरै नलिनु है आमा अब
अन्यायमा राँको झोस्ने यौटा सपुत पाएपछि ।

२.
जन्मेको युगको के कुरा बन्छन् सर्वकालिक पनि
सम्मानका लायकहरूको बनाउँछन् शालिक पनि
कुख्यातहरू मृत्युसंगै हराउँछन् विस्मृतिको गर्भमा
सच्चा लोकनायक सगर्व बन्छन् मनका मालिक पनि ।

३.
उर्वर सबल युवा शक्ति खाडीतिर जलेकै छ
समृद्धिको सपना हाम्रो धरहरा झैं ढलेकै छ
गहिरोमै तालपर्छ बजेट देखाउने दाँत न हो
संगठीत साहुहरुको ढ्याके चोके चलेकै छ ।

४.
खपिसाध्य कहाँ छ र चरक्क चर्कन जानेका छौ
पिपलपाते जता पनि फरक्क फर्कन जानेका छौ
सत्य सुत्यो इमान पनि यीनैले किनिसके भन्छन्
साँढेको फल देखाएर सहजै तर्कन जानेका छौ ।

५.
सफाईका अभियन्ता स्वयम् हिलो पोत्ने भए
समृद्धिको घाँस देखाउँदै मझेरी पो जोत्ने भए
जो जो कहलिएका थिए स्वनामधन्य मुक्तिदाता
खुम्चिएर केवल आफन्तलाई मात्र ओत्ने भए ।