हामी सबैकाे संसारन्यूज

कविराज घिमिरे
चाँगुनारायण, भक्तपुर

उठी बिहान मिर्मिरे पुगेँ त्यहाँ कतै पनि
युवा थिएन जोसिलो बुढाहरू भएपनि
कि रोकिएछ जन्म नै गरी सबै नियोजन
युवा कहाँ छ हे प्रभो ! कता भए प्रयोजन ?१

सुता वधूहरू कता गए भनेर खोज्दछु
बुढाबुढीहरूसँगै गई तुरुन्त सोध्दछु
रहेन पुत्र गाउँमा बजार शून्य देखियो
तरक्क आँसु झार्द्छन् जबाफ छैन के भयो ?२

न नातिको मुहारमा परेर दृष्टि फर्किए
न नातिनी छ साथमा भएछ प्रेम दूर ए
बनेर मित्र रोगको छ आसमात्र जीवन
झरेर पात बोटका सिनित्तझैँ छ यो मन ।।३

यता छ मात्र बालुवा नदी सुकेर केवल
अकासमा अभावको मडारिँदो छ बादल
बतास छैन आङमा छ हप्प हप्प देह यो
छ ओसभित्र यो धरा भएन काम घामको ।।४

भनेर भन्दछन् सबै भरङ्ग हुन्छ चित्त यो
थरङ्ग हुन्छ आत्तिँदै व्यथा सुनेर पित्त यो
सधैंँ बसेर मेचमा नहेर शास्तिको फुलो ।
छ को जगाउने यहाँ निभेछ देशको चुलो ।। ५

छन्द : पञ्चचामर
सूत्र : M lSl  SlS  lSl  SlS  lSl  S