Sansar News
२४ जेठ, इलाम। इलामको गोदकस्थित माईभगवती वृद्धाश्रम परिसरमा नवनिर्मित आवास भवनको उद्घाटन गरिएको छ ।
आफ्ना स्वर्गीय पति मेजर दिलीप राईको स्मृतिमा पत्नी राधा राईले वृद्धाश्रममा वृद्धवृद्धालाई सहयोग पुगोस् भनेर रु चार लाख नगद प्रदान गर्नुभएको रकममा अन्य स्रोतबाट पनि थप गरेर रु छ लाख ९० हजारको लागतमा तीनकोठे एकतले भवन निर्माण गरिएको वृद्धाश्रम प्रबन्ध समितिका सचिव धर्म गौतमले जानकारी दिनुभयो ।
वृद्धाश्रमको मुख्य प्रवेशद्वार छेउमै रहेको सो आवास भवन वृद्धाश्रममा रहेको शिवमन्दिरका पुजारीको आवासका रूपमा प्रयोग हुने कुरा प्रबन्ध समितिले जनाएको छ ।
वृद्धाश्रम परिसरमा बालउद्यान लगायतका पूर्वाधार निर्माण गरिने विष्णु दहालले जानकारी दिनुभयो । हाल आश्रममा तीन आवासीय भवन, एक भान्साघर, एक मन्दिर रहेको छ । वृद्धाश्रममा १३ जना वृद्धवृद्धा बस्दै आएका छन् ।
वि.सं.२०७४ जेठ २४ बुधवार ०३:५५ मा प्रकाशित
