हामी सबैकाे संसारन्यूज

काठमाडौं । निर्वाचन आयोगले मतदाता नामावली अभिलेख पूर्ण रूपमा सुरक्षित रहेको स्पष्ट गरेको छ। आयोगले विज्ञप्ति जारी गर्दै आफ्नो वेबसाइट तथा सूचना प्रणालीमा कुनै पनि प्रकारको अनधिकृत पहुँच नभएको र सुरक्षामा समस्या नरहेको जनाएको हो।

हालै सामाजिक सञ्जालमा आयोगको वेबसाइट ह्याक गरी मतदाता नामावलीसम्बन्धी सूचना प्राप्त गरिएको दाबीहरू सार्वजनिक भएपछि आयोगले त्यसको खण्डन गरेको हो। आयोगका अनुसार मतदाता नामावलीसम्बन्धी गोप्य सूचना कुनै पनि अनधिकृत व्यक्तिसम्म पुगेको छैन र नागरिकका कानुनअनुसार गोप्य राख्नुपर्ने सूचनाको सुरक्षा सुनिश्चित गरिएको छ।

विज्ञप्तिमा भनिएको छ, ‘सामाजिक सञ्जालमा राखिएका र साझा गरिएका दाबीहरूप्रति आयोगको गम्भीर ध्यानाकर्षण भएको छ। निर्वाचन आयोगको वेबसाइट तथा मतदाता नामावलीसम्बन्धी सूचनाहरूमा कुनै पनि अनधिकृत व्यक्तिको पहुँच पुगेको छैन र सूचना प्रणाली पूर्ण रूपमा सुरक्षित छ।’

यसबाहेक सामाजिक सञ्जालमा देखाइएका पीडीएफ फाइलसम्बन्धी आयोगले ती सामग्री विगतमा निर्वाचन प्रयोजनका लागि विभिन्न निर्वाचन कार्यालयहरू तथा राजनीतिक दलहरूलाई उपलब्ध गराइएका नियमित सामग्री भएको स्पष्ट गरेको छ।