हामी सबैकाे संसारन्यूज

काठमाडौं । नेपाली कांग्रेसका सभापति शेरबहादुर देउवाले प्रतिनिधिसभा निर्वाचनअघि महाधिवेशन गर्न नहुने अडानमा रहेका नेताहरू विमलेन्द्र निधि र कृष्णप्रसाद सिटौलालाई फेरी छलफलका लागि डाकेका छन्।

कार्यवाहक सभापति पूर्णबहादुर खड्का र महामन्त्रीद्वय गगनकुमार थापा तथा विश्वप्रकाश शर्मासँग महाधिवेशनसम्बन्धी छलफल जारी रहँदा देउवाले नेताद्वय निधि र सिटौलालाई पनि महाराजगञ्जस्थित आफ्नो निवासमा बोलाएका स्रोतले जनाएको छ।

देउवाले बोलाएपछि निधि र सिटौला नयाँ बानेश्वरस्थित आनन्दभूभि इभेन्ट्समा चलिरहेको संस्थापन पक्षीय भेलाबाट बाहिरिएका एक केन्द्रीय सदस्यले जानकारी दिए।

यसअघि देउवाले बिहीबार पनि निधि, सिटौला, पूर्वपदाधिकारी तथा केही केन्द्रीय सदस्यहरूसँग सामूहिक छलफल गरेका थिए। सो छलफलमा देउवाले आफ्नो नाम भजाइएको विषयमा असन्तुष्टि प्रकट गरेको बताइएको छ।

पूर्वपदाधिकारीहरूसँगको भेटपछि महामन्त्रीद्वय थापा र शर्मासँग देउवाको छुट्टै छलफल भएको थियो, तर सो भेट–वार्ता पनि कुनै निष्कर्षविना सकिएको थियो।