हामी सबैकाे संसारन्यूज

त्रिशूली (नुवाकोट), २१ असार । सूर्यगढी गाउँपालिका गणेशस्थानका किसान प्रल्हद पौडेलले आठ रोपनी खेतमा लगाएको चैते धान यस वर्ष विगत वर्षको तुलनामा बढी फल्यो ।

गत वर्ष करिब २७ टन धान फलेकोमा यस वर्ष ३२ टन फलेको उहाँले बताउनुभयो । जिल्ला कृषि विकास कार्यालयले चैतेधान उत्पादन वृद्धि गराउन कार्यक्रम सञ्चालन गरेपछि धानको उत्पादन बढेको पौडेलको भनाइ छ ।

“प्राविधिकको सल्लाह अनुसार धान रोपेपछि उत्पादन बढेको हो,” उहाँले भन्नुभयो ।

उहाँको मात्र होइन गणेशस्थानका १७ परिवारले धानको उत्पादन बढेको बताएका छन् । सरकारले वृहत्तर धान उत्पादन कार्यक्रम सञ्चालन गरेपछि चैतेधान उत्पादन बढेको हो ।

हार मिलाएर रोप्दा बीउ कम लाग्ने र झार गोड्नको लागि मेसिन प्रयोग गर्न सहज हुने जिल्ला कृषि विकास कार्यालयका प्रमुख डा कमलराज गैरे बताउनुहुन्छ । वृहत्तर धान उत्पादन कार्यक्रम जिल्लाका मदानपुर, थानसिङ, थानापति, खानिगाउँ, चौघडा, गणेशस्थान, कविलाश, रालुका, नर्जामण्डपलगायत ठाउँमा सञ्चालन भएको छ ।

उक्त कार्यक्रमअन्तर्गत ३९४ परिवारलाई समेटिएको छ । बाली बीमा गर्ने र लाइनमा मिलाएर धान रोप्ने किसानलाई रु दुई लाख ९१ हजार रकम प्रोत्साहनस्वरुप वितरण गरिएको छ । कार्यक्रम आगामी तीनवर्षसम्म सञ्चालन हुनेछ । आव २०७२÷७३ देखि वृहत्तर धान उत्पादन कार्यक्रम सुरु गरिएको हो ।

जिल्लामा छ हजार हेक्टरभन्दा बढी क्षेत्रफलमा चैतेधान लगाइन्छ । चैतेधानको उत्पादकत्व प्रतिहेक्टर ४.२ मेट्रिक टन रहेको छ । ताइचुङ, सीएच ४५, कञ्चन, खुमल ११, जिरा मसिनोलगायत जातको धान लगाउने गरिएको बाली विकास अधिकृत पुरुषोत्तम सुवेदीले जानकारी दिनुभयो । रासस