हामी सबैकाे संसारन्यूज

२४ साउन, रसुवा । उत्तरगया गाउँपालिका–३ पहिरेबेँसी क्षेत्रमा अविरल वर्षासँगै आएको पहिराले आइतबार राति घर पुरिँदा बेपत्ता भएका चारमध्ये तीन जनाको शव फेला परेको छ ।

सहायक प्रजिअ स्मिता पौडेलका अनुसार स्काभेटरको सहायताले घर पुरिएको स्थानमा खोजी गर्दा ३३ वर्षीया मुना थापा, चारवर्षीय रवीन्द्र थापा र ७८ वर्षीय भक्तबहादुर नगरकोटीको शव फेला परेको र तत्कालीन जिल्ला पञ्चायतका उपसभापति ७७ वर्षीय धर्मबहादुर थापाको भने खोजी भइरहेको छ ।

पहिरेबेँसी क्षेत्रमा बसोबासका लागि उपयुक्त नहुँदा ४० घर परिवारलाई अन्यत्र सारिएको छ । पहिराले पूर्णरुपमा क्षति भएका १४ घरमध्ये सम्पर्कमा आएका ११ घरपरिवारलाई प्रतिपरिवार रु १०–१० हजार र कम्बल तथा खाना पकाउने भाँडाकुँडा राहतस्वरुप प्रदान गरिएको पौडेलले जानकारी दिनुभयो । मंगलबार बिहानदेखि बेपत्ताको पुनः खोजी गरिने बताइएको छ ।