२ भदौ, रसुवा । बस्तीमा पहिरो गएपछि विस्थापित भएका बालबालिकाको पठनपाठन सुचारु गराइएको छ ।
उत्तरगया गाउँपालिकाका अध्यक्ष उपेन्द्रराज लम्सालका अनुसार आफ्नो गाउँपालिका क्षेत्रको पहिरोबेँसीमा गत साउन २२ गते पहिरोका कारण विस्थापित भएका १२१ घर परिवारलाई माथिल्लो त्रिशूली ‘थ्रि ए’को कोलोनीभित्र बसोबास गराई अस्थायीरुपको भएपनि सोही कोलोनीभित्र सबै बालबालिकालाई पठनपाठनको व्यवस्था गरिएको छ ।
भविष्यका कर्णधार बालबालिकालाई पठनपाठनका साथै सामाजिक संघसंस्थाको सहयोगमा खाद्यान्नलगायत लत्ताकपडा, भाँडाकँुडासमेतको व्यवस्था मिलाइएको बताइएको छ ।
बाढीपहिरोका कारण उत्तरगया गापाभित्रका सडक, खानेपानी, सिँचाइ, कुलो, कल्भर्ट, झोलुंगेपुलसमेतका संरचनामा क्षति पु¥याउँदा रु १० करोडभन्दा बढीको नोक्सान भएको र बतेगौडा सिँचाइ कुलोमा क्षति हुँदा सयौँ हेक्टर जमिनलाई सिँचाइको समस्या परेको अध्यक्ष लम्सालले बताउनुभयो ।
पहिरोबेँसी गाउँ पूरै विस्थापित छ यस्तो विपद्को घडीमा नियमित खाद्यान्न आपूर्तिमा सहयोगी हात पहिरोबेँसी केन्द्रित हुनेमा पूर्ण आशावादी रहेको बताउँदै अध्यक्ष लम्सालले पहिरोमा परी तत्कालीन जिल्ला पञ्चायतका उपसभापति धर्मबहादुर थापासहित चारजनाको निधन भएको बताउनुभयो ।
पहिरोबेँसीका विस्थापित परिवारको सहयोगार्थ त्यसतर्फ केन्द्रित रहन सबै निकायसँग समन्वयको भूमिका निर्वाह गरिएको जिल्ला समन्वय समितिका प्रमुख कुलप्रसाद भट्टले बताउनुभयो ।
वि.सं.२०७४ भदौ २ शुक्रवार ०४:३६ मा प्रकाशित