हामी सबैकाे संसारन्यूज

कुमार बज्र, टोकियो
अगस्त २६  र २७ तारेख दुई दिवसिय नेपाल डे फेस्टिवलमा वर्ल्ड नेवा अर्गनाईजेशन जापानद्वारा प्रस्तुत गरिएको नेवार भेषभुषा र सांस्कृतिक कार्यक्रम उल्लासमय रुपमा सम्पन्न भएको छ । नेपाल डे फेस्टिवल बिगत १० वर्ष देखि जापानमा आयोजना हुँदै आएको छ । जापानमा क्रियाशील संघसंस्थाहरुको सहकार्यमा एनआरएन जापानले यो वर्षको नेपाल डे फेस्टिवलको आयोजना गरेको हो ।

यसपालिको नेपाल डे फेस्टिवल २०१७  मा नेपालीहरुको सहभागी उल्लासमय रही सफल भएकोमा उक्त कार्यक्रम आयोजनाका संयोजक सुदन थापालाई अर्गनाईजेशनको तर्फबाट प्रतिनिधि प्रकाशलाल श्रेष्ठज्युले बधाई तथा धन्यवाद दिनुभएको छ ।नेपाल डे फेस्टिवल २०१७ भब्य सफल भएकोमा आयोजकलाई बधाई तथा वर्ल्ड नेवा अर्गनाइजेशन जापानको प्रस्तुति उल्लासमय नेपाल डे फेस्टिवल २०१७  भब्य रुपमा सफल भएकोमा आयोजक एन आर जापान र फेस्टिवल सफल पार्न दिनरात खटिनु भएका सम्पूर्ण साथीहरु, जापानवासी सम्पूर्ण संघसंस्था तथा नेपालीहरुलाई वर्ल्ड नेवा अर्गनाईजेशन जापानद्वारा बधाई तथा धन्यवाद दिनुभएको छ ।

गतवर्ष भन्दा यसपालिको फेस्टिवलमा आंशिक रुपमा भएपनि बढी जापानीहरुको उपस्थिति देखिएको थियो । अत्याधिक जापानवासी नेपालीहरुको सहभागिताले कार्यक्रम हर्ष उल्लासले सम्पन्न भएकोमा वर्ल्ड नेवा अर्गनाईजेशन जापानका प्रतिनिधि रामभक्त जोशीले आयोजक कमिटीलाई बधाई तथा धन्यवाद दिनुभएको छ ।

यसवर्षको कमिकमजोरलाई हटाई अर्को वर्ष नेपाल डे फेस्टिवलको दिन अहिले देखि नै घोषणा गर्नसकेको खण्डमा मन्चमा सकेसम्म नेपाली संस्कृति झल्कने कार्यक्रम र धेरै भन्दा धेरै प्रचार प्रसार गरि जापानीहरुको उल्लेखे सहभागिता गर्न सकिने कुरा अर्गनाईजेशनका प्रतिनिधि सन्दिप नारायण शाक्यले बताउनु भयो ।

लाखे, झ्यालिंचा नाच, तायमचा नाच, घिन्ता घिसि नाच, धिमे बाजा, भुस्या बाजा, कुमारी तथा नेवार भेषभुषाको प्रस्तुतिले नेपालको जात्रा जस्तै भरपुर मनोरंजन दिलाएको थियो ।

जापानवासी नेवारहरुको सक्रिय सहभागिताले यसपालिको नेपाल डे फेस्टिवलमा नेवार संस्कृति झल्कने बिभिन्न सांस्कृतिक कार्यक्रमहरुको प्रस्तुत गर्न सकिएको र  दुई दिने फेस्टिवलमा सहभागी हुनु भएका सम्पूर्ण नेपाली तथा जापानी साथीहरुलाई धेरै धेरै धन्यवाद दिनुहुँदै यसपालि केही मात्रामा भएपनि जापानीहरु सहभागि गराउन सकेकोमा वर्ल्ड नेवा अर्गनाईजेशन जापानका प्रतिनिधि ब्यांचा दाई यामानाकाले खुशी व्यक्त गर्नुभएको छ ।

नेवार संस्कृति भनेको नै नेपालको संस्कृति भएको हुनाले  जापानमा हाम्रो संस्कृतिको सरंक्षण, सम्बर्धन प्रचार प्रसार गर्ने र जापानीहरुलाई नेपाल भ्रमणप्रति आकर्षित गर्ने दायित्व हामी सम्पूर्ण जापानवासी नेपालीहरुको हातमा रहेको कुरा अर्गनाईजेशनका अर्को प्रतिनिधि जनकराज शाक्यले बताउनु भएको छ ।

फेस्टिवल सफल भएकोमा बधाई दिनु हुँदै नेपाल डे फेस्टिवलको मन्चमा यसपालि नेपालको संस्कृति झल्कने नेपाली सांस्कृतिक कार्यक्रमहरुलाई पहिलो प्राथमिकता दिनुभएकोमा आयोजकलाई धन्यवाद दिंदै  नेपालको सांस्कृतिक कार्यक्रमहरु प्रस्तुत गर्न वर्ल्ड नेवा अर्गनाईजेशन जापान संधै सहकार्य गर्न तत्पर रहेको कुरा को जानकारी अर्गनाईजेशनकी प्रतिनिधि इन्दिरा सुजुकी राजभन्दारीले बताउनुभएको छ ।

यसपालिको नेपाल डे फेस्टिवलको अन्तिम दिनमा आफु बसेको ठाउँ र त्यस वरिपरि सरसफाई गरियो । नेपाल डे फेस्टिवलको अन्तिम दिनमा सधैं झै फेस्टिवलमा भिजिट गर्नु हुने नेपालीहरुले गरेको फोहोरहरुले गर्दा आयोजकलाई सफा गर्न धेरै गाह्रो भएको र लाखौं जापानी येन सरसफाईको लागि आर्थिक भार व्यहोर्नु परेको छ । अब देखि जापानमा हुने यस्ता कार्यक्रमहरुमा सहभागि हुँदा जथाभाबि फोहोर फ्याक्ने बानि अरुले गरेपनि आफुले गर्दिनँ भन्ने भावना लिई सहभागि हुनुपर्ने देखिन्छ ।

वर्ल्ड नेवा अर्गनाईजेशन जापान, नेवा जागरण मंच जापान र नेवा गुथि जापानको सक्रियतामा यसपालिको नेपाल डे फेस्टिवलमा नेवार सांस्कृतिक कार्यक्रमहरु प्रस्तुत गरेको हो । शरद शेरचनले नेवार, गुरुङ, थकाली, सेर्पा, तामाङ्ग, शेरचन, बाहुन, क्षत्रि,थारु बिभिन्न नेपालका जात जातिको भेषभुषाको फेशन शो गरि त्यसको परिचय दिनुभएको थियो । धिमे तथा पन्चे बाजाका साथै बिभिन्न जातजातिहरुले आआफ्नो सांस्कृतिक प्रदर्शनहरु गरि नेपाल डे फेस्टिवल नेपालको बिभिन्न जातजातिको फुलवारी हो भनि देखाउन सफल भएको थियो ।