हामी सबैकाे संसारन्यूज

सुन्छु हल्ला मेरो बाटो काडे तारले बार्यौ अरे ।
खोज्दै आउला भन्ने डरले अन्तै डेरा सार्यौ अरे ।।
सत्य कुरा पत्ता लाउन आकै थिएँ तिम्रो शहर ।
तर तिमीले स्वयम आफ्नै परिचय फेरेयौ अरे ।।

जति दुःख देउ तिमी मैले पराई कैले ठान्ने छैन ।
खोजिरहन्छु सधै तिमीलाई हार कैले मान्ने छैन ।।
आरोप जति लगाउ तिमी आशिर्वाद नै ठान्छु मैले ।
तर मैले तिम्रा लागि तुच्छ वचन बोल्ने छैन ।।

तिम्रो भलो चिताइरहन्छु खुट्टा कैले तान्ने छैन ।
आफ्नो ठानी फर्की आए झन्झट कैले मान्ने छैन ।।
तिम्रो सामु उभिएर हाइ भन्न न सके नि ।
तर तिमीलाई टेडो नजर बनाई कैले हेर्ने छैन ।।

जीवन हाम्रो सङ्घर्ष हो थाक्ने कुरा गर्दिन म ।
दुनियाँ ले जे जे भनोस कसैको भर पर्दिन म ।।
तिम्रा पनि पाइलाहरु सधै अघि बडिरहुन ।
तर तिम्रो रोजाईको बाटो बन्द गर्दिन म ।।