Sansar News
१३ फागुन, दुनै, डोल्पा । हिमाली जिल्ला डोल्पामा आगलागीमा परी तीन महिला गम्भीर घाइते भएका छन् ।
श्निबार दिउँसो त्रिपुरासुन्दरी नगरपालिका–५ मा पर्ने कागुत्तो वनमा लागेको आगलागीमा परेर तीन महिला गम्भीर घाइते भएका हुन् ।
घाइते हुनेमा त्रिपुरासुन्दरी नगरपालिका–६ फुल्चिङ बस्ने १६ वर्षीया प्रतिमा रोकाय सोही स्थानकी ६२ वर्षीया चाउरी चलाउने र सोही स्थानकै ६० वर्षीया मनरुपा चलाउने रहेको जिप्रका डोल्पाका प्रहरी नायब उपरीक्षक हरिप्रसाद शर्माले जानकारी दिए ।
उनीहरु शनिबार बिहान ११ बजेतिर नजिकैको छिमेकी गाउँ ल्हाँबाट घर फर्कने क्रममा कागुत्तो वनमा लागेको आगलागीमा परी गम्भीर घाइते भएको प्रहरीले जनाएको छ ।
उपचारका लागि सेनाको हेलिकप्टरबाट सुर्खेत लगिएको र सुर्खेतमा उपचार नभएपछि उपचारका लागि नेपालगञ्ज लगिएको काली चलाउनेले बताए ।
आगो कसले लगाएको हो भन्ने पत्ता नलागेकाले अनुसन्धान गरिरहेको प्रहरीले जनाएको छ । घाइते तीन महिला बेहोस अवस्थामा रहेको बताइएको छ ।
वि.सं.२०७४ फागुन १३ आइतवार ०३:३९ मा प्रकाशित
