हामी सबैकाे संसारन्यूज

१० मंसिर, काठमाडौँ । प्रधानमन्त्री केपी शर्मा ओलीको स्वास्थ्य अवस्था स्थिर रहेको बताइएको छ । साझॅ ७ः३० मा अस्पतालद्वारा जारी स्वास्थ्य बुलेटिनका अनुसार उनको अवस्था स्थिर रहेको जनाइएको हो ।

प्रधानमन्त्री ओलीको शल्यक्रियापश्चात हाल सघन कक्षमा उपचार भइरहेको तथा उनको स्वास्थ्य अवस्था स्थिर रहेको त्रिभुवन विश्वविद्यालय, चिकित्सा शास्त्र अध्ययन संस्थान मनमोहन कार्डियोथोरासिक भास्कुलर तथा ट्रान्सप्लान्ट सेन्टरका कार्यकारी निर्देशक प्रा डा उत्तमकृष्ण श्रेष्ठले विज्ञप्तिमार्फत जानकारी दिएका छन् ।

प्रधानमन्त्रीका प्रेस सल्लाहकार सुर्य थापाका अनुसार प्रधानमन्त्री ओलीको उपचार चिकित्सको प्रत्यक्ष निगरानीमा सघन उपचार कक्षमा भैरहेको छ । प्रधानमन्त्रीलाई राखिएको भेन्टिलेटर सम्भवत आजै निकालिने जानकारी दिँदै उनले केही दिन अस्पतालमै राखेर उपचार गर्नुपर्ने चिकित्सकको सुझाव रहेको बताएका छन् ।

अन्य संक्रमण नहोस् भन्नाका लागि डाक्टरहरु जुटेको भन्दै सल्लाहाकार थापाले चिन्तित नहुन तथा प्रधानमन्त्रीको स्वास्थ्य लाभको कामना गर्न आग्रह गरेका छन् ।

प्रधानमन्त्री ओलीको स्वास्थ्यमा अचानक समस्या आएपछि आज दिउँसो एपेन्डिसाइटिसको सफल शल्यक्रिया भएको थियो ।