१८ भदौ, गलकोट । उत्पादित आलु भण्डारण गरी बेमौसममा बिक्री गर्न काठेखोला गाउँपालिका–३ धम्जामा सहकारीको अगुवाईमा आलु चिस्यान केन्द्र निर्माण गरिएको छ ।
धम्जामा क्रियाशील हिमचुली कृषि सहकारी संस्था लिमिटेडको अगुवाइमा रु. २७ लाखको लागतमा आलु सो केन्द्र निर्माण गरिएको हो । आलुको पकेट क्षेत्रका रुपमा चिनिने धम्जामा आलुको भण्डारणको अभावका कारण सस्तो मूल्यमा आलु विक्री गर्दा किसान मर्कामा पर्दै आएकाले सो केन्द्र बनाइएको सहकारीले जनाएको छ ।
धम्जामा मुख्य बालीका रुपमा आलुखेती गरिन्छ । चिसो स्थानमा उत्पादित आलु निकै स्वादिष्ट भएकाले यहाँको आलुले राम्रो बजार पाएको छ । एकैपटक उत्पादन हुने आलु बारीबाटै बेच्दा मूल्य नपाउने समस्याका कारण सो केन्द्र निर्माण गरिएको सहकारीका सचिव गोपाल श्रीसले बताए । श्रीसले भने, “चिस्यान केन्द्रमा भण्डार गर्दा आलु दोब्बर मूल्यमा बिक्री गर्न सकिन्छ ।” गण्डकी प्रदेश सरकारको रु.१४ लाख ३० हजार, काठेखोला गाउँपालिकाको रु.४ लाख १२ हजार, हिमचुली कृषि सहकारीको रु. ५ लाख र कृषकको रु. ५ लाख ५० हजार बराबरको श्रमदानमा आलु चिस्यान केन्द्र बनाइएको हो । किसानलाई प्रोत्साहन गर्न प्रदेश सरकारले सहयोग गरेको प्रदेशसभा सदस्य इन्द्रलाल सापकोटाले बताए ।
सहकारीमा आवद्ध ६० शेयर सदस्य तथा अन्य आलुखेती गर्ने किसानले उपभोग गर्ने गरी सो केन्द्र निर्माण गरिएको काठेखोला गाउँपालिका–३ धम्जाका वडा अध्यक्ष याम श्रीसले बताए । धम्जामा वार्षिक एक करोड बराबरको आलु उत्पादन हुन्छ । वडा कार्यालयले गाउँपालिकाकोे सहयोगमा धम्जालाई आलुको पकेट क्षेत्रका रुपमा विकास गर्न लागिरहेको छ । बागलुङमा ढोरपाटन, ताराखोला, तमानखोला, निसिखोला र धम्जालगायतका स्थान आलु उत्पादनका दृष्टिले राम्रो स्थान मानिन्छन् ।
करीब २०० क्विन्टल आलु राख्ने क्षमताको सो केन्द्र निर्माणसँगै यहाँका आलु कृषक हर्षित भएका छन् । केन्द्रमा बिक्री र बिउँका लागि छुट्टाछुट्टै भण्डारण गर्न मिल्ने व्यवस्था छ । सञ्चालन कार्यविधि बनाएर केन्द्र सञ्चालन गरिनेछ । केन्द्रमा आलु राखेवापत शेयर सदस्य तथा अन्य आलुखेती गर्ने किसानले विद्युत महशुल तथा हेरालो खर्च व्योहोनुपर्ने हुन्छ । रासस
वि.सं.२०७६ भदौ १८ बुधवार ०९:४६ मा प्रकाशित