काठमाडौं । राष्ट्रिय प्रजातन्त्र पार्टी (राप्रपा)का अध्यक्ष पशुपति शमशेर राणाले प्रधानमन्त्री केपी शर्मा ओलीको स्वास्थ्य अवस्था सार्वजनिक गर्न माग गरेका छन् । सोमबार सामाजिक सञ्जाल ट्विटमार्फत उनले यस्तो माग गरेका हुन् ।
सल्लाहकार, स्वीकय सचिव र सुरक्षाकर्मीहरु समेत कोरोना संक्रमित भईरहेको बेला प्रधानमन्त्री ओलीको स्वास्थ्य अवस्था सार्वजनिक गर्न राणाले माग गरेका हुन् । अध्यक्ष राणाले ओलीको अवस्था सार्वजनिक गरिनु उपयुक्त हुने बताएका छन् ।
‘प्रमको स्वास्थ्य सार्वजनिक चासो र महत्वको विषय हो, प्रम केपी ओलीका सल्लाहकार स्वकीय(सचिव सुरक्षाकर्मी कोरोना संक्रमित भएबाट प्रम स्वयमको स्वास्थ्य स्थिति, आइसोलेसनमा बस्नु पर्ने नपर्ने भन्नेबारे सरकारको औपचारिक जानकारी सार्वजनिक भए उपयुक्त हुने थियो’, राणाले भनेका छन्, ‘विश्वव्यापी प्रचलन यस्तै छ।’
गत शुक्रबार गरिएको कोरोना परीक्षणमा प्रधानमन्त्री ओलीका प्रमुख सल्लाहकारदेखि केहि सुरक्षाकर्मीलाई कोरोना संक्रमण देखिएको विषय सार्वजनिक भएको थियो । तर, प्रधानमन्त्री ओलीको विषयमा भने सार्वजनिक भएको छैन् ।
प्रमको स्वास्थ्य सार्वजनिक चासो र महत्वको विषय हो। प्रम केपी ओलीका सल्लाहकार स्वकीय-सचिव सुरक्षाकर्मी कोरोना संक्रमित भएबाट प्रम स्वयमको स्वास्थ्य स्थिति, आइसोलेसनमा बस्नु पर्ने नपर्ने भन्नेबारे सरकारको औपचारिक जानकारी सार्वजनिक भए उपयुक्त हुने थियो। विश्वव्यापी प्रचलन यस्तै छ।
— Pashupati Shumshere (@PashupatiShams) October 5, 2020
वि.सं.२०७७ असोज १९ सोमवार १४:३० मा प्रकाशित
