काठमाडौं । कर्णाली प्रदेशको मुख्यमन्त्रीमा नेपाली कांग्रेस प्रदेशसभा दलका नेता जीवन शाहीले दाबी पेस गरेका छन्। गठबन्धनका तीन दलका २० सांसदहरुको हस्ताक्षरसहित शाहीले मुख्यमन्त्रीमा दाबी पेश गरेका हुन् ।
प्रदेश प्रमुख गोविन्दप्रसाद कलौनीले मंगलबार बेलुका साढे ७ बजेभित्र मुख्यमन्त्रीको लागि दाबी पेस गर्न आह्वान गरेका थिए। शाहीले अपरान्ह ४ बजे प्रदेश प्रमुख कहाँ पुगेर दाबी पेश गरेका छन् ।
माओवादीका महेन्द्रबहादुर शाहीले सोमबार मुख्यमन्त्रीबाट राजीनामा दिएपछि कांग्रेसका जीवन शाही नेपालको संविधानको धारा १६८ (२) बमोजिम मुख्यमन्त्रीमा नियुक्त हुँदैछन्। जसअनुसार नेकपा माओवादी केन्द्र र नेकपा (एकीकृत समाजवादी)को समर्थन उनलाई हुनेछ।
कर्णालीमा माओवादी केन्द्रका ११, कांग्रेसका ६ र एकीकृत समाजवादीका ३ प्रदेश सभा सदस्य छन्। हाल कायम ३५ प्रदेश सभा सदस्य रहेको प्रदेश सभामा बहुमतका लागि १८ मत आवश्यक पर्दछ।
सरकारको दाबी गरेपछि आज नै शपथ हुनसक्ने सांसद दिनबन्धु श्रेष्ठले बताए। मुख्यमन्त्रीसहित अन्य मन्त्रीले शपथ लिने बारे हालसम्म निर्णय नभएको श्रेष्ठले जानकारी दिए।
वि.सं.२०७८ कात्तिक १६ मंगलवार १७:१६ मा प्रकाशित
