Sansar News
काठमाडौं । उच्चस्तरीय राजनीतिक समितिको बैठक आज बस्दैछ ।
उच्चस्तरीय राजनीतिक संयन्त्रका अध्यक्ष केपी शर्मा ओलीको संयोजकत्वमा प्रधानमन्त्री निवास बालुवाटारमा दिउँसो ३ बजे बस्न लागेको उक्त बैठकमा रास्वपा सरकारबाट बाहिरीएपछिको उत्पन्न राजनीतिक परिस्थिति, राष्ट्रपति, उपराष्ट्रपति निवार्चन लगायतका विषयमा छलफल हुने बताइएको छ ।
बैठकमा सत्ता गठबन्धन दल नेकपा एमाले, नेकपा माओवादी केन्द्र, राष्ट्रिय प्रजातन्त्र पार्टी, जनता समाजवादी पार्टी, जनमत पार्टी र नागरिक उन्मुक्ति पार्टीका प्रतिनिधिहरूको उपस्थिति रहनेछ ।
सरकार संचालनमा सहयोग पुर्याउनका लागि ओलीको नेतृत्वमा पुस १५ गते गठन गरिएको उक्त उच्च राजनीति संयन्त्रको सदस्यमा माओवादी केन्द्रका अध्यक्ष प्रचण्ड, रास्वपाका सभापति रवि लामिछाने, राप्रपाका अध्यक्ष राजेन्द्र लिङ्देन र जसपाका अध्यक्ष उपेन्द्र यादव सदस्य रहेका छन् ।
बुधबार प्रधानमन्त्री पुष्पकमल दाहाल ‘प्रचण्ड’ र एमाले अध्यक्ष केपी शर्मा ओलीबीच बालकोटमा भएको भेटवार्तापछि आजका लागि उक्त बैठक तय गरिएको बताइएको छ ।
वि.सं.२०७९ माघ २६ बिहीवार ०८:१८ मा प्रकाशित
