Sansar News
५ असोज, काठमाडौँ । राष्ट्रिय फोटो पत्रकार समूह (एनएफपिजे) को २२औँ विशेष साधारणसभाले गोरखापत्रको फोटो पत्रकार राजेन्द्र चित्रकारको संयोजकत्वमा नयाँ कार्यसमिति निर्विरोध चयन गरेको छ । आज यहाँ आयोजित विशेष साधारणसभाले तत्कालीन कार्यसमिति भङ्ग गरी निर्विरोध नयाँ कार्यसमिति चयन गरेको हो ।
समितिको उपाध्यक्ष कृष्ण खड्का (रातोपाटी डट कम), महासचिव प्रदीपराज वन्त (रासस), सचिव नवराज श्रेष्ठ (हिमालय टाइम्स), कोषाध्यक्ष लेखबहादुर श्रेष्ठ (न्यूज अभियान) र सहकोषाध्यक्ष चन्द्रकला क्षेत्री (नयाँ पत्रिका) चयन भएका छन् । सदस्यहरुमा नवराज वाग्ले, तेजबहादुर बस्नेत, शोभा महर्जन, आर्यन धिमाल, गगन अर्याल, सुशीला श्रेष्ठ, मुकुन्द कालिकोटे, प्रदीप श्रेष्ठ र राजेन्द्र थापा रहेका छन् ।
कार्यक्रमको उद्घाटन गर्दै नेपाल पत्रकार महासङ्घका अध्यक्ष गोविन्द आचार्यले नेपालमा फोटोग्राफीलाई फोटो पत्रकारको रूपमा स्थापित गराउने एनएफपिजेले खेलेको भूमिकाको स्मरण गरे ।
वि.सं.२०७५ असोज ६ शनिवार १७:०४ मा प्रकाशित
