Sansar News
४ पुष, काठमाण्डौं । विश्वविद्यालय अनुदान आयोगले काठमाडौंको कुलेश्वरस्थित जनमैत्री बहुमुखी क्याम्पस सहित चारवटा क्याम्पसलाई संस्थागत गुणस्तर सुनिश्चितता तथा प्रत्ययन (क्यूएए) प्रमाणपत्र उपलब्ध गराउने भएको छ ।
विश्वविद्यालय अनुदान आयोगका अनुसार ललितपुर चापागाँउस्थित जनभावना क्याम्पस, बनेपाको काभ्रे बहुमुखी क्याम्पस र महेन्द्रनगरको कञ्चन विद्या मन्दिर सामुदायिक क्याम्पसले क्यूएए पाएका छन् ।
आयोगले उनीहरूलाई आगामी ७ पुसमा आयोगमै एक समारोह गरी क्यूएए प्रमाणपत्र प्रदान गर्ने निर्णय गरेको छ ।
अनुदान आयोगको क्यूएए विभागका अनुसार हालसम्म देशभरिका सरकारी, सामुदायिक तथा निजीस्तरका ३६ शैक्षिक संस्थाले क्यूएए प्रमाणपत्र पाइसकेका छन् ।
नेपालमा हाल सामुदायिक र प्राइभेट गरी १ हजार १ सय ६६, आंगिक ६० गरी कुल १ हजार २ सय २६ वटा क्याम्पस छन् ।
आयोगमा त्रिविबाट सम्बन्धन प्राप्त ४ सय ५० वटा क्याम्पस दर्ता भएका छन् । अहिले नौवटा विश्वविद्यालय छन् । नेपालमा २०३९ सालबाटै सामुदायिक क्याम्पसहरू सञ्चालन गर्न थालिएको हो ।
वि.सं.२०७६ पुस ४ शुक्रवार ११:२७ मा प्रकाशित
