हामी सबैकाे संसारन्यूज

२ बैशाख, काठमाण्डौं । मुस्लिम आयोगले विश्वभरी महामारीका रुपमा फैलिएको कोरोना भाइरसको कोभिडको विषम परिस्थिति र नेपालमा त्यसको रोकथाम र नियन्त्रणका लागि सरकारलाई सहयोग गर्न तयार रहेको जनाएको छ ।

आयोगले मंगलबार एक विज्ञप्ति जारी गर्दै नेपाल सरकारले प्रत्येक जिल्लामा थप क्वारेन्टाइनको व्यवस्था गर्दा यस कार्यमा मुस्लिम आयोग सहयोग गर्न तयार रहेको बताएको हो ।

‘देशभरी नै प्रयाप्त संख्यामा होस्टेल समेतका मदरासा उपलब्ध छन् । ती मदरासाहरुमा भान्सा घर, शौचालय, स्नान कक्ष, विजुली, खानेपानी आदिको व्यवस्था रहने गर्दछ । त्यसरी नै प्रयाप्त आकारको मैदानहरु पनि ती मदरासामा उपलब्ध छन्,’ विज्ञप्तिमा भनिएको छ, ‘यी मदरासाहरुमा क्वारेन्टाइन व्यवस्थापन गर्न सकेमा निकै सहज हुने भएकाले मुस्लिम आयोग नेपाल सरकारलाई यस्ता मदरासा भवन उपलब्ध गराउन पहल गर्नेछ ।

आयोगका अध्यक्ष समिम अन्सारीद्धारा मंगलबार जारी गरिएको विज्ञप्तिमा राज्य विपद्मा परेका बेला क्वारेन्टाइन प्रयोजनका लागि आफ्ना मदरासा भवन उपलब्ध गराएर सहयोग गर्न चाहाने मदरासा व्यवस्थापन समितिहरुले आयोगलाई सम्पर्क गर्न समेत अनुरोध गरिएको छ ।