हामी सबैकाे संसारन्यूज

काठमाडौँ । नेपाल चिकित्सक संघ (एनएमए) को नयाँ नेतृत्वका लागि भएको निर्वाचनमा डा. राकेश शाह अत्यधिक मतका साथ बिजयी भएका छन् । केन्द्रीय सदस्य तर्फ दोस्रो बढि मत ल्याई बिजयी भएका डा. शाहले २७८० मत प्राप्त गरेका हुन् ।

बंगलादेशबाट एमबिबिएस र एमडि  गरेका डा. शाहले विश्वव्यापी नेपाली विद्यार्थी संगठन (WNSO) बंगलादेशको संस्थापक अध्यक्ष हुँदै ढाकामा नेपाली विद्यार्थीहरुको अभिभावक भई सामाजिक काम गरेका थिए । भूकम्पमा राहत साथै स्वास्थ सामाग्री जुटाउन अहोरात्र मेहनत गरेका उनले कोरोनाको समयमा पनि उल्लेख्य सामाजिक उत्तरदायीत्व निर्वाह गरेका थिए । लामो समय ऐक्यबद्धता पत्रिकासँगको आवद्धतामा उनले नेपाली विद्यार्थीहरुको पक्षमा जागरणमूलक शन्देश सम्प्रेषण गरेका थिए । आन्द्रा तथा मलद्धार बिशेषज्ञका रुपमा स्थापित उनी पेशाले कोलोरेक्टल सर्जन हुन् ।

सङ्घमा डा बद्री रिजालको नेतृत्वमा १९ सदस्यीय नयाँ कार्यकारणी समिति चयन भएको छ । मंगलबार सम्पन्न भएको मतगणनामा उनले नेतृत्वमा नयाँ कार्यकारणी समिति चयन गरिएको प्रमुख निर्वाचन अधिकृत डा प्रणयरत्न शाक्यले जानकारी दिए । डा रिजाल तीन हजार १९६ मत प्राप्त गरी विजयी भएका हुन् । उनका निकटत प्रतिद्वन्द्वी डा मङ्गल रावलले दुई हजार ९४० मत प्राप्त गरेका छन् ।

वरिष्ठ उपाध्यक्षमा डा सञ्जीव तिवारी र महासचिवमा डा विश्वराज दवाडी विजयी भएका छन् । यस्तै, उपाध्यक्षतर्फ कोशीबाट डा रोशन खड्का, मधेसबाट डा अमितरञ्जन मिश्र, बागमतीबाट डा सुवास भट्टराई, गण्डकीबाट डा यज्ञराज सिग्देल, लुम्बिनीबाट डा नन्दाकुमारी गुरुङ, कर्णालीबाट डा रविन खड्का र सुदूरपश्चिमबाट डा प्रमोद जोशी विजयी भएका छन् ।

कोषाध्यक्षमा डा संयुक्त आचार्य, सहसचिव डा हुलास अग्रवाल र सहकोषाध्यक्षमा डा तेजसुसिंह मल्ल विजयी भएका छन् । केन्द्रीय सदस्यहरुमा डा. अमित झा, डा. राकेश शाह, डा. पल्पसा श्रेष्ठ, डा. बिना श्रेष्ठ, डा. सुस्मित काफ्ले र डा. शेषराज घिमिरे बिजयी भएका छन् ।

सङ्घको उपत्यकाबाहिर वैशाख ४ र ५ गते तथा उपत्यकामा वैशाख १८ र १९ गते निर्वाचन सम्पन्न भएको थियो । निर्वाचनमा कुल १६ हजार एक सय मतमध्ये सात हजार १०२ मत खसेको थियो ।