हामी सबैकाे संसारन्यूज

जेठ १७, काठमाडौं । लुम्बिनी प्रदेशमा राष्ट्रिय सभा सदस्यका लागि भएको निर्वाचनमा नेपाली कांग्रेससहितको विपक्षी गठबन्धनका उम्मेदवार दृगनारायण पाण्डे विजयी भएका छन् । उनले सत्तारुढ नेकपा (एमाले)का उम्मेवार चन्द्रबहादुर खड्कारलाई पराजित गराएका हुन् ।

सोमबार भएको मतदानमा पाण्डेले ४ हजार १४० मतभार पाए। उनका विपक्षी एमालेका उम्मेद्‌वार चन्द्रबहादुर खड्काले ३ हजार ५९४ मतभार पाए।

पाण्डेलाई नेकपा (माओवादी केन्द्र), जसपाको उपेन्द्र यादव पक्ष र राष्ट्रिय जनमोर्चाले समर्थन गरेको थियो । एमालेको माधवकुमार नेपाल पक्षले पनि उनलाई सहयोग गरेको थियो ।

कुल ३ सय मतदाता रहेको प्रदेशमा २ सय ९७ जनाले मतदान गरेका थिए । मतदानमा बाँकेको नेपालगञ्ज उपमहानगरका मेयर र नरैनापुर गाउँपालिकाका अध्यक्ष र गुल्मीको गुल्मीदरबार गाउँपालिकाका अध्यक्ष उपस्थित थिएनन् ।

पाण्डे यसअघि एमालेको तर्फबाट लुम्बिनी प्रदेशको प्रदेश सभा सदस्य थिए । उनले प्रदेश सभा सदस्यबाट राजीनामा दिएर कांग्रेस प्रवेश गरेका थिए । कांग्रेस प्रवेश गरेका उनलाई विपक्षी गठबन्धनको सहमतीमै उम्मेदवार बनाइएको थियो ।

उपनिर्वाचनमा पराजित भएका खड्का नेकपा (माओवादी केन्द्र) छाडेर एमाले प्रवेश गरेका नेता हुन् । राष्ट्रिय सभा सदस्य रहेका खड्काको पार्टी परिवर्तनसँगै राष्ट्रिय सभा सदस्य पद पनि गुमेको थियो । पार्टी परिवर्तनसँगै पदमुक्त भएका खड्कालाई एमालेले पुनः उम्मेदवारको रुपमा अघि सारेको थियो ।