Sansar News
जेठ २९, काठमाडौं । गण्डकी प्रदेशको मुख्यमन्त्रीमा अन्ततः नेपाली कांग्रेसको संसदीय दलका नेता कृष्णचन्द्र नेपाली पोखरेल नियुक्त भएका छन् ।
प्रदेशप्रमुख सीता पौडेलले उनलाई संविधानको धारा १६८ (५) अनुसार नियुक्ती गरेकी हुन् । विपक्षी गठबन्धनको तर्फबाट समर्थन पाएका पोखरेलले शुक्रबार आफ्नो पक्षमा ३१ सांसदको उपस्थितिसहित मुख्यमन्त्रीमा दाबी पेश गरेका थिए ।
विपक्षी गठबन्धनको तर्फबाट पोखरेलले दाबी पेश गर्दा प्रदेशसभाबाट विश्वासको मत गुमाएका कामचलाउ सरकारका मुख्यमन्त्री पृथ्वी सुब्बा गुरुङ्गले पनि दाबी पेश गरेका थिए ।
गुरुङ्गले पार्टी कारबाहीमा परेका राष्ट्रिय जनमोर्चाका सांसद कृष्ण थापा र जनता समाजवादी पार्टी (जसपा)को महन्थ ठाकुर समूहका एक सांसदको हस्ताक्षरसहित दाबी पेश गरेका थिए । जसको विरोधमा विपक्षी गठबन्धन धर्नामा उत्रिएको थियो ।
संविधानको धारा १६८ (५) अनुसार नियुक्ती पाएका पोखरेलले आगामी ३० दिनभित्र विश्वासको मत लिनुपर्नेछ ।
को हुन् मुख्ममन्त्री बनेका पोखरेल ?
२००६ साल मंसिर १३ गते तनहुँको तनहुँसुरमा जन्मेका ७१ वर्षीय पोखरेल नवलपरासी पूर्व १ ९क० बाट प्रत्यक्ष निर्वाचित सांसद हुन्।
नेपाली कांग्रेसका पुराना नेतामा गनिने पोखरेल २०२८ सालमा नेपाली कांग्रेसको जिल्ला सदस्य बनेका थिए । ६ पटकभन्दा बढि जेलमा परेका पोखरेल २ वटा विषयमा स्नातक गरेका छन् ।
उनले भारतको दरभंगाबाट मानविकी र त्रिभुवन विश्वविद्यालयबाट कानुनमा स्नातक गरेका छन्।
वि.सं.२०७८ जेठ २९ शनिवार १७:४५ मा प्रकाशित
