हामी सबैकाे संसारन्यूज

जेठ २९, काठमाडौं । गण्डकी प्रदेशको राजनीतिमा नयाँ मोड देखिएको छ ।

विपक्षी गठबन्धनले ३१ सांसदलाई सशरीर उपस्थित गराएर कांग्रेस नेता कृष्णचन्द्र नेपाली पोखरेललाई मुख्यमन्त्री दाबी गरिरहेको बेला विश्वासको मत गुमाएका पृथ्वीसुब्बा गुरुङ्गले पनि दाबी पेश गरेका छन् । उनले जनमोर्चाका कारबाही परेका सांसद कृष्ण थापा र जसपाको महन्थ ठाकुर समूहका सांसदलाई देखाएर दाबी पेश गरेका छन् ।

सशरीर बहुमत सांसदको हस्ताक्षरसहित दाबी पेस गरे पनि मुख्यमन्त्रीमा नियुक्त नगरिएको भन्दै अहिले प्रदेश प्रमुख सीताकुमारी पौडेल निवास अगाडि विपक्षी गठबन्धनका ३१ सांसद धर्नामा बसेका छन् ।

माओवादी केन्द्रका सांसद दीपक कोइरालाले जनाएअनुसार प्रदेश प्रमुखको निवासभित्र छिर्न नदिएपछि धर्नामा बसिएको हो । उनका अनुसार प्रदेशसभा नै सिध्याउने षडयन्त्र हुने संकेत देखिए पछि सबै सांसद एकजुट भएका हुन् ।

‘निकै षडयन्त्रको संकेत देखिएको छ, हामी प्रदेश प्रमुखलाई केहि कुरा राख्छौं भनेर आएका हौं तर भित्र छिर्न पाएका छैनौं’, कोइरालाले भनेका छन् ।

सम्बन्धित समाचार

गण्डकीमा दोहोरियो केन्द्रको राजनीति, संसदमा विश्वास गुमाएका गुरुङ्गले गरे बहुमतको दाबी