Sansar News
जेठ २९, काठमाडौं । गण्डकी प्रदेशसभाबाट विश्वासको मत गुमाएका पृथ्वीसुब्बा गुरुङ्गले पनि मुख्यमन्त्रीमा दाबी गरेका छन् । उनले राष्ट्रिय जनमोर्चा र जनता समाजवादी पार्टीको समर्थन पत्रसहित मुख्यमन्त्रीमा दाबी गरेका हुन् ।
राष्ट्रिय जनमोर्चाको कारबाहीमा परेका सांसद कृष्ण थापालाई संसदीय दलको नेता मानेर गुरुङ्गले दाबी पेश गरेको पाइएको छ । त्यस्तै गुरुङ्गले दाबी पत्रमा जसपाको पूर्व राजपा समूहका एक सांसदको समर्थन आफुँलाई रहेको दाबी पेश गरेका छन् ।
विपक्षी गठबन्धनले शुक्रबार सशरीर ३१ सांसदसहित प्रदेश प्रमुख सीता पौडेल समक्ष मुख्यमन्त्रीमा दाबी पेश गरेका थिए । तर, प्रदेश प्रमुखले दिएको समयसीमा सकिनै लाग्दा गुरुङ्गले जसपा १ र राष्ट्रिय जनमोर्चाका कारबाहीमा परेका सांसदको हस्ताक्षर बोकेर दाबी गर्न गएका हुन् ।
यसअघि गुरुङ्ग सबैभन्दा ठूलो दलको नेताको हैसियतमा गत वैशाख २९ मा मुख्यमन्त्रीमा नियुक्ती भएका थिए । तर उनले प्रदेशसभामा विश्वासको मत हासिल गर्न नसकेपछि शुक्रबार प्रदेश प्रमुखले २४ घण्टे समयसीमा दिएर नयाँ सरकार गठनको लागि आव्हान गरेकी थिइन् ।
प्रदेश प्रमुखको आव्हानमा विपक्षी गठबन्धनको तर्फबाट कांग्रेस संसदीय दलका नेता कृष्णचन्द्र नेपाली पोखरेलले शुक्रबार नै ३१ सांसदको उपस्थितिमा मुख्यमन्त्रीको पदमा दाबी गरेका थिए ।
यसअघि केन्द्रमा विपक्षी गठबन्धनका सांसदले हस्ताक्षर बुझाउँदा राष्ट्रपति विद्यादेवी भण्डारीले प्रधानमन्त्रीमा नियुक्ती गर्न अस्वीकार गरेकी थिइन् । उनले प्रधानमन्त्री केपी शर्मा ओलीको दाबीलाई देखाउँदै दुवै पक्षको दाबी नपुगेको बताएकी थिइन् ।
केन्द्रको किचलो साम्य नभईरहेको बेला प्रदेशमा पनि सोही खालको शैली देखिएको छ । प्रदेशमा देखिएको किचलो प्रदेशसभा विघटन गर्ने षडयन्त्र भएको विपक्षी गठबन्धनको आरोप छ ।
वि.सं.२०७८ जेठ २९ शनिवार १६:५९ मा प्रकाशित
