Sansar News
असार १७, काठमाडौं । नेकपा (एमाले)को वरिपठ नेता माधवकुमार नेपाल पक्षको स्थायी समिति बैठक आज बस्ने भएको छ । माधव पक्षीय नेता बेदुराम भुसालले बताएअनुसार बैठक केहि बेरमा बस्दैछ ।
बैठक पार्टी अध्यक्ष केपी शर्मा ओलीले बोलाएको केन्द्रीय कमिटी बैठकमा जाने कि नजाने भन्ने टुंगो लगाउन बोलाइएको हो ।
ओलीले सर्वोच्च अदालतले अवैध भनेको दशौं राष्ट्रिय महाधिवेशन आयोजक कमिटीको बुधबार बैठक राख्दै केन्द्रीय कमिटीमा रुपान्तरण गर्ने निर्णय गरेका थिए । केन्द्रीय कमिटीमा रुपान्तरण गरिएको उक्त कमिटीको बैठक शुक्रबारका लागि बोलाइएको छ ।
माधव पक्षका अधिकांश नेताहरु उक्त बैठकमा सहभागी हुनुपर्ने बताईरहेका छन् । माधव पक्षकी नेतृ अष्टलक्ष्मी शाक्यले बुधबार संसार न्यूजसँग कुराकानी गर्दै बैठकमा सहभागी हुन आवश्यक भएको बताएकी थिइन् ।
उनले पार्टी एकतालाई बचाउन र ओलीलाई रुपान्तरण गर्नका लागि भएपनि बैठकमा सहभागी हुनुपर्ने धारणा राखेकी थिइन् ।
वि.सं.२०७८ असार १७ बिहीवार ११:३१ मा प्रकाशित
