हामी सबैकाे संसारन्यूज

कावासोती । कावासोती खानेपानी तथा सरसफाइ संस्थाको आगामी निर्वाचनका लागि रमाकान्त काफ्लेले सचिव पदमा आफ्नो उम्मेदवारी घोषणा गरेका छन्। शिक्षा, सामाजिक सेवा तथा व्यवस्थापन क्षेत्रमा हासिल गरेको अनुभवलाई समुदायको हितमा प्रयोग गर्ने उद्देश्यसहित उनले उम्मेदवारी सार्वजनिक गरेका हुन्।

काफ्लेले उच्च शिक्षा हासिल गर्ने क्रममा काठमाडौंका प्रतिष्ठित गैरसरकारी संस्थाहरूमा तथा विदेशमा रहँदा विभिन्न सामाजिक संघ–संस्थाहरूमा सचिव पदमा रही सेवा गर्ने अवसर प्राप्त गरेको बताएका छन्। सोही क्रममा हासिल गरेको अनुभव, सीप र नेतृत्व क्षमतालाई आफ्नै समुदायको विकासमा उपयोग गर्ने लक्ष्यसहित आफू निर्वाचन मैदानमा उत्रिएको उनको भनाइ छ।

उम्मेदवारी घोषणासँगै काफ्लेले स्वच्छ तथा गुणस्तरीय खानेपानीको सुनिश्चितता, छिटो–छरितो तथा प्रभावकारी सेवा प्रवाह, संस्थागत सुशासन, पारदर्शिता तथा जवाफदेहिताको प्रवर्द्धनलाई आफ्नो मुख्य प्राथमिकतामा राखेको बताएका छन्।

“खानेपानी सेवा उपभोक्ताको दैनिक जीवनसँग प्रत्यक्ष रूपमा जोडिएको विषय भएकाले संस्थालाई अझ प्रभावकारी, पारदर्शी र सेवामुखी बनाउने मेरो प्रतिबद्धता रहनेछ,” काफ्लेले बताएका छन्। उनले उपभोक्ताको विश्वास र सहयोगलाई आफ्नो मुख्य शक्ति मानेर संस्थाको समग्र विकासका लागि इमानदार र जिम्मेवार ढंगले कार्य गर्ने दृढ संकल्प लिएको उल्लेख गरेका छन्।

काफ्लेले संस्थालाई आधुनिक, व्यवस्थित तथा उपभोक्तामैत्री बनाउने लक्ष्यसहित आगामी दिनमा सेवा प्रवाहलाई थप सहज, छिटो र प्रभावकारी बनाउने योजना पनि सार्वजनिक गरेका छन्। उनले संस्थागत विकाससँगै सुशासनको अभ्यासलाई सुदृढ गर्दै उपभोक्ताको हकहितलाई केन्द्रमा राखेर काम गर्ने प्रतिबद्धता व्यक्त गरेका छन्।

“एक मत रमाकान्त काफ्लेलाई, सक्षम नेतृत्व र संस्थाको उज्ज्वल भविष्यका लागि” भन्ने नारासहित चुनावी अभियान अघि बढाइरहेका काफ्लेले आगामी निर्वाचनमा आफूलाई अमूल्य मत, विश्वास र समर्थन प्रदान गर्न सम्पूर्ण उपभोक्तासमक्ष हार्दिक अनुरोध गरेका छन्।

उनले सबै उपभोक्तालाई संस्थाको समग्र विकास र समुदायको हितका लागि एकताबद्ध हुन आग्रह गर्दै स्वच्छ, सुरक्षित र समुन्नत भविष्य निर्माणमा सहकार्य गर्न आह्वान गरेका छन्।