Sansar News
साउन १८, काठमाडौं । आज बस्ने भनिएको नेकपा (माओवादी केन्द्र) को स्थायी कमिटीको बैठक स्थगित भएको छ । दिउँसो ३ बजेका लागि बोलाइएको बैठक आन्तरिक तयारी नपुगेको भन्दै स्थगित गरिएको हो ।
माओवादी स्थायी समिति सदस्य गणेश शाहका अनुसार केहि विषयमा शीर्ष तहमा छलफल गर्न आवश्यक देखिएकाले बैठक स्थगित गरिएको हो । आजको बैठकमा सरकारमा सहभागी हुने मन्त्री छान्नेलगायतका विभिन्न विषयमा छलफल हुने बताइएको थियो ।
माओवादी केन्द्रले अझै सात मन्त्रालय पाउने सम्भावना रहेको छ । शेरबहादुर देउवा नेतृत्वको सरकारमा यसअघि जनार्दन शर्माले अर्थ मन्त्रालय र पम्फा भुसालले उर्जा मन्त्रालयको जिम्मेवारी पाइसकेका छन् ।
माओवादीबाट नारायणकाजी श्रेष्ठ, देवप्रसाद गुरुङ हरिबोल गजुरेल, देवेन्द्र पौडेल, हरिराज अधिकारी, मातृका यादव, जयपुरी घर्ती, अञ्जना विशंखे, शशी श्रेष्ठ, सुदन किराती, अमनलाल मोदी, शिवकुमार मण्डललगायतको सरकारमा जाने चर्चा रहेको छ । माओवादी केन्द्रमा मन्त्रीका आकांक्षी धेरै भएपछि कसलाई मन्त्री बनाउने भन्ने सकसमा नेतृत्व रहेको बताइएको छ ।
वि.सं.२०७८ साउन १८ सोमवार ११:३४ मा प्रकाशित
