हामी सबैकाे संसारन्यूज

साउन २०, काठमाडौं । नेपाल विद्युत प्राधिकरणका प्रमुख कार्यकारी निर्देशक हितेन्द्रदेव शाक्यले सरकारले वैकिल्पक बाटो दिए प्राधिकरण छाड्न तयार रहेको बताएका छन् । बुधबार सरकारले पद छाड्न गरेको आग्रहबारे पत्रकार सम्मेलन गर्दै उनले यस्तो बताएका हुन् ।

उनले वैकल्पिक उपाय दिए सहजै प्राधिकरण छाड्ने प्रष्ट पारे । ‘वैकल्पिक बाटो दिए जान तयार छु’, उनले भने, ‘मेरो क्षमताअनुसार अहिलेसम्मको दक्षताअनुसार मलाई जहाँ जिम्मेवार दिएपनि सरकारले खटाएको ठाउँमा काम गर्न कुनै गाह्रो छैन ।’

पत्रकारहरुले सरकारले राजीमाना मागेको सन्दर्भमा अदालत जाने त होइन् भनि राखेको प्रश्नमा शाक्यले भने अन्याय नभए किन अदालत जाने भनि प्रतिप्रश्न गरे । ‘अन्याय भयो भने अदालत जाने हो, नत्र किन जाने ?’ उनले भने ।

प्राधिकरणबाट अपमानजनक नभई सम्मानजनक रुपमा बाहिरिन चाहेको संकेत शाक्यको छ ।

प्रधानमन्त्री शेरबहादुर देउवाले शाक्यलाई हटाएर पूर्वकार्यकारी निर्देशक कुलमान घिसिङलाई प्राधिकरणमा ल्याउन चाहेका छन् । मंगलबार देउवाको निर्देशनमा उर्जामन्त्री पम्फा भुसालले शाक्यलाई ठाउँ छाडिदिन आग्रह गरेकी थिइन् ।