Sansar News
काठमाडौं । संयुक्त विद्यार्थी संगठनले नेपालका मेडिकल कलेजहरुको मनोमानीका विरुद्ध आन्दोलनमा उत्रने चेतावनी दिएका छन् ।
संयुक्त विद्यार्थी संगठनले विभिन्न मेडिकल कलेजहरुले विद्यार्थीहरुबाट राज्यले तोकेको भन्दा बढि आफुखुशी विभिन्न बहानामा लाखौं रुपैयाँ नाजायज शुल्क लिएको गुनासो आएको तथा विद्यार्थीहरुद्धारा गरिएको आन्दोलनप्रति ध्यानाकर्षण भएको जनाएका छन् ।
‘नेपालका मेडिकल कलेजहरुले बिगत लामो समय देखि चिकित्सा क्षेत्रका विद्यार्थीहरु माथि विभिन्न बहानामा लुट मच्चाई रहेका छन, यसैको शृङ्खलाको रुपमा चिकित्सा शिक्षा आयोगले तोकेको मापदण्ड विपरीत काठमाडौ विश्वविद्यालयका सम्बन्धन प्राप्त मेडिकल कलेजहरु काठमाडौं मेडिकल कलेज सिनामंगल, नोबेल मेडिकल कलेज मोरङ र मणीपाल मेडिकल कलेज कास्कीले २०७८ को नयाँ भर्नामा MBBS, BDS रB nursing मा राज्यले तोकेको भन्दा बढि विद्यार्थीहरुबाट आफुखुशी विभिन्न बहानामा लाखौं रुपैयाँ नाजायज शुल्क लिएको गुनासो आएको र मणीपाल मेडिकल कलेज पोखरा, काठमाडौ मेडिकल कलेज, नोवेल मेडिकल कलेज मोरङमा विद्यार्थीहरु आन्दोलित भएको प्रती संयुक्त विद्यार्थी संगठनको गम्भीर ध्यानाकर्षण भएको छ ।’ संयुक्त विद्यार्थी संगठनहरुद्धारा जारी विज्ञप्तिमा उल्लेख छ ।
चिकित्सा शिक्षाका विद्यार्थीहरुको जायज मागहरुमा ऐक्यबद्धता जाहेर गर्दै विद्यार्थीहरुलाई सहज वातावरणमा भर्ना र पठनपाठन गराउन जोडदार माग गर्दै अन्यथा विद्यार्थीहरुको पक्षमा सयुक्त विद्यार्थी संगठनले आन्दोलन गर्ने र यसबाट उत्पन्न हुने परिणाम स्वयं कलेजले भोग्नु पर्ने चेतावनी समेत विद्यार्थी संगठनले दिएका छन् ।
ने.वि.संघका अध्यक्ष राजिव ढुंगाना, अखिल (क्रान्तिकारी)की अध्यक्ष पञ्चा सिंह, अनेरास्ववियूका अध्यक्ष सुदेश पराजुली, समाजवादी बिध्यार्थी यूनियनका अध्यक्ष रुपनारायण श्रेष्ठ,अखिल (क्रान्तिकारी)का अध्यक्ष हरिकृष्ण गजुरेल र प्रकाश शाही र अखिल छैठौंका अध्यक्ष देवेन्द्र कुँवरद्धारा जारी गरिएको संयुक्त विज्ञप्तिमा चिकित्सा शिक्षाका विद्यार्थीहरुको जायज मागहरुमा ऐक्यबद्धता जाहेर गर्दै विद्यार्थीहरुलाई सहज वातावरणमा भर्ना र पठनपाठन गराउन जोडदार समेत माग गरेका छन् ।
‘अन्यथा विद्यार्थीहरुको पक्षमा सयुक्त विद्यार्थी संगठनले आन्दोलन गर्ने र यसबाट उत्पन्न हुने परिणाम स्वयं कलेजले भोग्नु पर्ने छ भन्ने छ जानकारी पनि यसै विज्ञप्ति मार्फत जनकारी गराउदछौं ।’ उक्त विज्ञप्तिमा भनिएको छ ।
वि.सं.२०७८ पुस १६ शुक्रवार १५:४२ मा प्रकाशित
