Sansar News
काठमाडौं । अवैधानिक रुपमा केन्द्रीय सदस्यमा चयन भएको भन्दै उद्योगपति विनोद चौधरीविरुद्व कांग्रेस केन्द्रीय निर्वाचन समितिमा उजुरी परेको छ । सिरहा क्षेत्र नम्बर ३ का महासमिति सदस्य डा. सुभाषचन्द्र यादवले चौधरीको चयनविरुद्ध उजुरी दिएका हुन् । उनले चौधरीको पद खारेजीको माग गरेका छन् ।
यादवले उजुरीमा अवैधानिक रुपमा कोटाको प्रयोग गरि चौधरी केन्द्रीय सदस्य बनेको आरोप लगाएका छन् । साथै कांग्रेसको विधानअनुसार चौधरी केन्द्रीय सदस्यको उम्मेदवार नै हुन नपाइने दाबी यादवले गरेका छन् ।
‘मधेसी खुला पदमा निर्वाचित भएको भनिएका विनोद चौधरी कांग्रेसमा निरन्तर १० वर्ष क्रियाशील सदस्य नभएको निज २०७४ मा कांग्रेसमा प्रवेश गरेकोले निजको केन्द्रीय सदस्यमा उम्मेदवार नै हुन नपाउने स्पष्टै छ’, यादवले उजुरीमा भनेका छन् ।
कांग्रेसको विधानमा स्पष्ट रुपमा केन्द्रीय सदस्य बन्नको लागि निरन्तर १० वर्ष क्रियाशील सदस्यता लिएको हुनुपर्ने उल्लेख छ । तर, व्यवसायी चौधरीको सबालमा भने त्यो व्यवस्था लत्याइएको छ ।
लामो समय एमालेको राजनीति गरेका चौधरी २०७४ मा समानुपातिक सूचीबाट सांसद बन्दै कांग्रेस प्रवेश गरेका थिए । कांग्रेस प्रवेश गरेको ४ वर्षमै १४ औं महाधिवेशनबाट उनी केन्द्रीय सदस्यमा निर्वाचित भएका थिए ।
कांग्रेसको विधानमा स्पष्ट रुपमा केन्द्रीय सदस्य बन्नको लागि निरन्तर १० वर्ष क्रियाशील सदस्यता लिएको हुनुपर्ने उल्लेख छ । तर, व्यवसायी चौधरीको सबालमा भने त्यो व्यवस्था लत्याइएको छ ।
साथै चौधरीमाथि मधेशी कोटाको दुरुपयोग गरेको आरोप छ । धनाड्य चौधरी पिछडिएका मधेशी समुदायलाई समेट्न बनाइएको कोटाको प्रयोग गर्दै केन्द्रीय समितिमा चयन भएका छन् ।
वि.सं.२०७८ पुस २२ बिहीवार १२:०६ मा प्रकाशित
