Sansar News
काठमाडौं । सत्ता गठबन्धनले राष्ट्रियसभा निर्वाचनका लागि आफ्ना उम्मेदवारलाई जिताउन सातै प्रदेशमा समन्वय समिति गठन गर्ने निर्णय गरेको छ । समितिका संयोजक कांग्रेस वरिष्ठ नेता रामचन्द्र पौडेलको अध्यक्षतामा बिहीबार बिहान प्रधानमन्त्रीको सरकारी निवास बालुवाटारमा बसेको बैठकले आफ्ना उम्मेदवार विजयी गराउन मतदाताहरूलाई अपिल गर्दै यसका लागि सातै प्रदेशमा संयन्त्र गठन गर्ने निर्णय गरेको हो।
बैठकमा सहभागी कांग्रेस नेता एवं सरकारका प्रवक्ता ज्ञानेन्द्रबहादुर कार्कीका अनुसार गठबन्धनले सातवटै प्रदेशमा संयन्त्र बनाउने र राष्ट्रिय सभा सदस्यमा उठेका आफ्ना उम्मेदवारहरूलाई जिताउन अपिल गर्ने निर्णय गरिएको हो।
राष्ट्रिय सभामा रिक्त १९ सदस्य पदका लागि माघ १२ गते निर्वाचन हुँदै छ भने यसका लागि ४३ जनाले उम्मेदवारी दर्ता गराइसकेका छन्।
बिहीबार बिहान बसेको उच्चस्तरीय राजनीतिक समन्वय समितिको बैठकमा संयोजक पौडेलसहित प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादीका अध्यक्ष माधवकुमार नेपाललगायत नेता सहभागी भएका थिए।
यसैबीच उच्चस्तरिय समितिले प्रधानमन्त्री शेरबहादुर देउवालाई भारत भ्रमणको शुमकामना दिएको छ । देउवा यही पुस २५ देखि भारत भ्रमणमा जाँदैछन् ।
वि.सं.२०७८ पुस २२ बिहीवार १२:२३ मा प्रकाशित
