हामी सबैकाे संसारन्यूज

काठमाडौं । राष्ट्रपति विद्यादेवी भण्डारीसँग भेटवार्ताका लागि नेपाली कांग्रेसका नेताहरु शीतलनिवास पुगेका छन् । प्रधानमन्त्रीसमेत रहेका कांग्रेससभापति शेरबहादुर देउवाको नेतृत्वमा कांग्रेस नेताहरु सोमवार दिउँसो शीतलनिवास पुगेका हुन् ।

राष्ट्रपतिलाई भेट्न देउवासहित, उपसभापति धनराज गुरुङ, महामन्त्री गगन थापा र सञ्चार तथा सूचना प्रविधि मन्त्री ज्ञानेन्द्र बहादुर कार्की गएका छन् ।

पुनर्विचारका लागि फिर्ता पठाएको नागरिकता विधेयक हुबहु पारित गरेपछि राष्ट्रपति सरकारसँग असन्तुष्ट छिन् । कांग्रेस नेताहरुले बताएअनुसार नागरिकता विधेयकको विषयलाई लिएर राष्ट्रपतिले परामर्शका लागि बोलाएकी हुन् ।

नागरिकता विधेयकलाई लिएर विभिन्न पक्षसँग परामर्श गरेकी राष्ट्रपति भण्डारीले यसअघि लोसपाका नेताहरुसँग पनि छलफल गरेकी थिइन् ।