Sansar News
काठमाडौं । निलम्बित प्रधान्यायाधीश चोलेन्द्र शम्शेर राणा आफूविरुद्ध लागेको महाअभियोगबारे बयान दिन सिंहदरबार पुगेका छन् । प्रतिनिधिसभाको महाभियोग सिफारिस समितिसमक्ष बयान दिन राणा सिंहदरबारस्थित कानुन, न्याय तथा मानवअधिकार समितिको बैठक कक्षमा पुगेका हुन् ।
आफूमाथि लागेका आरोपबारे राणाले सफाइ दिनुपर्ने छ । यसअघि समितिले राणा विरूद्धका प्रमाण मागेको थियो ।
नेपाल बार एशोसिएसन र सर्वोच्च बार एशोसिएसनले विभिन्न प्रमाण कागज र सञ्चार माध्यमहरूमा आएका समाचारका लिंकहरू महाअभियोगको प्रमाणको रुपमा समितिलाई बुझाएका थिए । समितिले गत शुक्रबार गोरखापत्रमा सूचना प्रकाशित गरी ३ दिनभित्र प्रमाण, कागजात र जानकारी पठाउन आग्रह गरेको थियो।
राणाविरुद्ध २०७८ फागुन १ मा प्रतिनिधिसभामा महाभियोग दर्ता भएको थियो । सोही दिनदेखि उनी निलम्बनमा परेका थिए ।
फागुन १ मा महाभियोग दर्ता भएको भएपनि प्रतिनिधि सभाले साउन १५ मा मात्रै राणाविरूद्धको महाअभियोगको प्रस्ताव समितिमा पठाउने निर्णय गरेको थियो। महाभियोग सिफारिस समितिले २०७९ भदौ १ गतेदेखि काम थालेको थियो ।
वि.सं.२०७९ भदौ १५ बुधवार ११:५० मा प्रकाशित
