हामी सबैकाे संसारन्यूज

काठमाडौं । नेकपा एमालेका नेता महेश बस्नेतले पार्टीभित्र देखिएको नेतृत्व विवादलाई लिएर व्यक्ति परिवर्तनभन्दा पार्टीको समग्र पुनर्संरचना र संगठन सुदृढीकरण आवश्यक रहेको बताएका छन्।

सामाजिक सञ्जालमार्फत धारणा सार्वजनिक गर्दै बस्नेतले नेतृत्व परिवर्तन मात्रै पार्टी पुनर्गठनको आधार हुन नसक्ने टिप्पणी गरेका छन्।

उनले भनेका छन्, ‘आवश्यकता व्यक्ति परिवर्तन होइन, पार्टीको समग्र पुनर्संरचना र सुदृढीकरण हो। सिसीको बिर्को फेर्दैमा पुनर्गठन हुँदैन। पार्टीको नीति, संगठन, कार्यशैली र जनसम्बन्धमा सुधार आवश्यक छ।’

बस्नेतले भीम रावल, घनश्याम भुसाल र माधवकुमार नेपालको राजनीतिक यात्रालाई उदाहरणका रूपमा प्रस्तुत गर्दै नेतृत्वको विरोध मात्र गर्दैमा राजनीति बलियो नहुने दाबी गरेका छन्। पार्टीबाट बाहिरिएपछि उनीहरूको राजनीतिक प्रभाव कमजोर भएको उनको टिप्पणी छ।

बस्नेतले एमाले अध्यक्ष केपी शर्मा ओली महाधिवेशनबाट निर्वाचित भएको उल्लेख गर्दै अहिले नै नेतृत्वविरुद्ध मोर्चाबन्दी गर्नु उचित नभएको बताएका छन्।

उनले भनेका छन्, ‘नेकपा एमालेका अध्यक्ष केपी शर्मा ओली महाधिवेशनबाट निर्वाचित अध्यक्ष हुनुहुन्छ, कसैले टीका लगाएर बनाएको होइन।’

महाधिवेशनमा ओलीकै टिममा पर्न प्रतिस्पर्धा गर्ने केही नेताहरूले महाधिवेशन सम्पन्न भएको ६ महिना पनि नपुग्दै नेतृत्वविरुद्ध मोर्चाबन्दी गर्नु लोकतान्त्रिक विधि र संस्थागत प्रक्रियामाथिको प्रहार भएको उनको आरोप छ।

बस्नेतले अहिले नेतृत्व परिवर्तनभन्दा पार्टीभित्र फैलिएको भ्रम चिर्ने, संगठनलाई थप एकताबद्ध बनाउने र सरकारका गलत कदमविरुद्ध खबरदारी गर्ने समय भएको बताएका छन्।

‘नेतृत्व परिवर्तनको समय पनि आउँछ। त्यतिबेला लोकतान्त्रिक विधिबाट सम्मानजनक हस्तान्तरण गरौँ। अहिले धैर्य, एकता र संगठन सुदृढीकरण आवश्यक छ,’ उनले भनेका छन्।