हामी सबैकाे संसारन्यूज

काठमाडौं । नेपाली कांग्रेसले अनौठो गरी प्रधानमन्त्री पुष्पकमल दाहाल प्रचण्डलाई समर्थन ग¥यो । कांग्रेसकै सहयोगले प्रचण्डले दुई तिहाई बढी सदस्यको विश्वासको मत पाए ।

तर, प्रचण्डले कांग्रेसको अस्वभाविक मत पाइरहँदा उनीमाथि कुनै भित्रि सम्झौता त गरेको होइन भन्ने प्रश्न उठेको छ । एमालेको समर्थनमा प्रधानमन्त्री बनेका प्रचण्डले आगामी सत्ता समीकरण कांग्रेससँग गर्न खोजेका त होइनन् ? एमालेमात्रै होइन अन्य दलमा पनि प्रश्न उब्जेको छ ।

मंगलबार संसदमा बोल्दै एमाले अध्यक्ष केपी शर्मा ओलीले पनि कांग्रेसको अस्वभाविक समर्थनप्रति प्रश्न उठाएका थिए । उनले कांग्रेसले “माछा नभएको खोलामा जाल फ्याँक्यो, केही पाउँदैन” भन्ने प्रतिक्रिया दिएका छन् ।

कांग्रेसको अस्वभाविक समर्थन पाएको बारे मंगलबार संसद भवनबाट बाहिरिने क्रममा पनि प्रचण्डमाथि सञ्चारकर्मीले थुप्रै प्रश्न तेर्साए । उनीमाथि कांग्रेससँग शक्ति बाँडफाँटबारे सहमति गरिएको त होइन ? भनि प्रश्न गरे ।

तर, प्रचण्डले आफुँले कांग्रेससँग कुनै सम्झौता नगरेको दाबी गरेका छन् । “विश्वासको मत दिने विषयमा कुनै सर्त छैन”, प्रचण्डले भनेका छन् । उनीमाथि राष्ट्रपति र उपराष्ट्रपतिमा लेनदेन भएको त होइन ? भन्ने प्रश्न पत्रकारले तेर्साएका थिए ।

प्रतिनिधिसभामा २७५ सदस्य छन् । त्यसमध्ये एक सांसद निलम्बित छन् भने राप्रपा सांसद पशुपति शमशेर जबरा बैठकको अध्यक्षता ग्रहण गरेकाले मतदानमा सहभागी भएनन् । मंगलबार भएको मतदानमा २७० सांसदमात्रै सहभागी भएका थिए । जसमध्ये प्रचण्डले २६८ मत पाएका छन् भने विपक्षमा २ मत खसेको छ ।

नेपाल मजदुर किसान पार्टीका प्रेम सुवाल र राष्ट्रिय जनमोर्चाका चित्रबहादुर केसीबाहेक सबै दल र स्वतन्त्र सांसदहरूले प्रधानमन्त्री दाहाललाई विश्वासको मत दिएका छन् ।