हामी सबैकाे संसारन्यूज

काठमाडौं । माघ महिनामा मात्रै महँगी झण्डै डेढ रुपैयाँले बढेको छ । नेपाल राष्ट्र बैंकले आइतबार प्रकाशित गरेको तथ्याङ्कअनुसार माघमा वार्षिक बिन्दुगत आधारमा मुद्रास्फिती ७.८८ प्रतिशत रहेको छ । जुन अघिल्लो वर्षको सोही अवधिको तुलनामा झण्डै डेढ रुपैयाँले बढी हो । अघिल्लो बर्ष मुद्रास्फिती दर ६.२४ प्रतिशत थियो ।

त्यस्तै, चालु आर्थिक वर्षको पुस महिनामा मुद्रास्फिती ७.२६ प्रतिशत रहेको थियो । पुस महिनामाभन्दा माघ महिनामा शून्य दशमलब ६२ प्रतिशतले मुल्यवृद्धि भएको छ । यो अवधिमा सबैभन्दा धेरै गैरखाद्य पदार्थतर्फको मूल्यबृद्धि भएको राष्ट्र बैंकले जनाएको छ । गैरखाद्यतर्फ पनि सबैभन्दा बढी यातायात उपसूचक समूहको मूल्य १५.५८ प्रतिशतले बढ्दा सबैभन्दा कम मनोरञ्जन तथा संस्कृति तर्फको ८.८१ प्रतिशतले महंगी बढेको छ ।

उच्च व्यापार घाटा

चालु आर्थिक वर्षको समिक्षा अवधिमा पनि व्यापार घाटा भने उच्च भएको छ । तथापि गत वर्षको सोहि अवधिको तुलनामा निर्यात तर्फ २९ प्रतिशतले कमि आई रु ९३ अर्ब ४३ करोड कायम भएको छ, भने आयततर्फ १९.९ प्रतिशतले कमि आइ ९ खर्ब १९ अर्ब १७ करोड कायम भएको छ ।

राष्ट्र बैंकका अनुसार अघिल्लो वर्ष सोहि अवधिमा निर्यात ८८.३ प्रतिशतले बढेको थियो भने आयत ४२.८ प्रतिशतले बढेको थियो ।
यद्यपी सरकारले वैदेशिक मुद्रा संचिति कम भएको भन्दै कतिपय बस्तु तथा सेवाहरुको आयतमा परिमाणात्मक बन्देज लगाउँदासमेत उच्च मात्रामा आयत हुनु र निर्यात समेत घट्नु चिन्ताजनक देखिएको छ ।

त्यस्तै देशबाट निर्यात हुने मध्यावर्ती तथा अन्तिम उपभोग्यवस्तुको निर्यात हिस्सा क्रमशः ५३.९ प्रतिशत तथा ४५. ५ प्रतिशत रहेको छ । पूँजीगत बस्तुको निर्यात भने निरासाजनक देखिएको छ । यस्ता बस्तुहरुको निर्यातको हिस्सा जम्मा ०.५३ प्रतिशत मात्र रहेको छ ।

विदेशबाट मध्यावर्ती तथा अन्तिम उपभोग्यवस्तुको आयत हिस्सा क्रमशः ५३.१ प्रतिशत तथा ३८.३ प्रतिशत रहेको छ भने पूँजीगत बस्तुको हिस्सा ८.६ प्रतिशत रहेको छ ।

रेमिट्यान्स २७ प्रतिशतले बढ्यो

चालु आर्थिक वर्षको सात महिनामा विप्रेषण आप्रवाहमा २७.१ प्रतिशतले बृद्धिभएको राष्ट्र बैंकले जनाएको छ । अघिल्लो वर्ष सोहि अवधिमा विप्रेषण आप्रवाहमा ४.४ प्रतिशतले गिरावट आएको थियो । माघसम्ममा ६ खर्ब ८९ अर्ब ८८ करोड विप्रेषण अप्रवाह भएको छ ।

याे पनि हेर्नुहाेस्