हामी सबैकाे संसारन्यूज

काठमाडौं । स्टेजमा गीत गाइरहेका आफुमाथि सिसाको बोतललेहान्ने युवकलाई चर्चित गायक प्रकाश सपुतले माफी दिएका छन् ।

आइतबार रोमानियाका नेपाली दर्शकका बीच ‘याद म्युजिक फेस्टिवल’ मा गीत गाएर मनोरन्जन दिइरहेका गायक सपुतमाथि दर्शक दिर्घाबाट एक्कासी बोतल प्रहार भयो । यद्यपी सामान्य चोट लागेका गायक सपुत ठूलो दुर्घटनाबाट बचे । आफुमाथि बोतल प्रहार हुँदासमेत संयमित बनेका सपुतले बोतल हान्ने युवकलाई केही नगर्न स्टेजबाटै अनुरोध गरेका थिए ।अन्तत बोतल हान्ने युवकले सपुतको खुट्टा नै समाएर माफी माग्दै रमाइलो गर्दागर्दै गल्ति भएको र आफुलाई बोतल हान्न कसैले नउक्साएको बताएपछि सपुतले उनलाई माफी दिएका हुन् ।

सपुतले उक्त घटनाबाट आफुलाई पीडा भएपनि ती युवक र उनका परिवारको भविष्य हेरेर माफी दिएको बताएका छन् ।

‘मलाई तपाईले हान्नु भयो, मलाई केही भएन । घाँउ भयो त्यो सन्चो हुन्छ । यस्तो तालले तपाईको भविष्य राम्रो होला ?

तपाईका बाबुआमाले के भन्लान् ?’ सपुतले माफी दिँदै भनेको भिडियो यतिबेला सामाजिक संजालमा चर्चामा आएको छ ।
आयोजकले उनीमाथि कानुनी कारबाही नगरेपनि झण्डै ७५ हजार नेपाली क्षतिपूर्ति तिराउने भएको बताइएको छ ।
उक्त कार्यक्रमका लागि गायिका प्रिती आलेपनि रोमानिया पुगेकी थिइन् ।