हामी सबैकाे संसारन्यूज

काठमाडौँ । काठमाडौँको माइतीघर देखी नयाँ बानेश्वरमा कबाड व्यवसायीहरूले प्रदर्शन गरेका छन् । महानगरपालिकाले रिङ रोड भित्रबाट कबाड हटाउने निर्णय गरेपछि उनीहरू आन्दोलित बनेका हुन् ।

कबाड व्यवसायी सङ्घर्ष समिति गठन गरेर उनीहरू प्रदर्शनमा उत्रिएका हुन् । प्रदर्शनकारीहरूले छोटे राजाहरूको आतङ्क बन्द गर, कबाड व्यवसायीको रक्षा गर, कानुनी शासन लागु गर, अदालतको निर्णयको सम्मान गर जस्ता प्लेकार्ड बोकेर नारा लगाएका थिए ।

रिङ रोडभित्रका कबाड हटाउने काठमाडौँ महानगरपालिकाको निर्णयविरुद्ध प्रदर्शन गरिएको सङ्घर्ष समितिले जनाएको छ । आफूहरूको व्यवसायलाई विस्थापित गर्ने उद्देश्यले रिङ रोडभित्रका कबाड हटाउन लागिएकोले आन्दोलन गर्नु परेको व्यवसायीहरूको भनाइ छ ।

काठमाडौँ महानगरका नगर प्रहरीले जबरजस्त शैलीमा आफूहरूलाई विस्थापित गराउन खोजेको व्यवसायीहरूको आरोप छ । जनप्रतिनिधिहरूले कबाड सङ्कलन केन्द्रका कारण धेरै असुरक्षा भएको गुनासो आएका कारण नक्सा पास नगरी राखिएका कबाड सङ्कलन केन्द्रमा यसअघि डोजर चलाइएको महानगरको भनाइ छ ।

महानगरले यसअघि माइकिङ गरेर कबाड सङ्कलन केन्द्र हटाउन सूचना गरेको थियो । तर कबाड व्यवासयीले कबाड सङ्कलन केन्द्र हटाउन नमानेपछि महानगरले डोजर समेत चलाएको थियो । महानगरका अनुसार महानगरभित्र ९० वटा कबाडी सङ्कलन केन्द्र रहेको र ३२ वटै वडामा कतै पनि कवाडी व्यवसाय राख्न नदिने नीति महानगरको छ ।