हामी सबैकाे संसारन्यूज

काठमाडौँ । काठमाडौँ महानगरपालिका–२९ स्थित घट्टेकुलो चोकमा डेरामा बस्नेको सहजताका लागि दुर्गा स्थापना गरेर घटस्थापनासहित सामूहिक पूजा आराधना भइरहेको छ । जय जनता ट्रेनिङ वेलफेयर काउन्सिलले गत वर्षदेखि घट्टेकुलो चोकमा दुर्गाको अस्थायी मूर्ति स्थापना गरेर पूजा, आराधना गर्न थालेको हो ।

काउन्सिलका अध्यक्ष सुनिलराज भण्डारीले विभिन्न जिल्लाबाट काठमाडौँ आएर डेरामा बस्नेलाई दुर्गा देवीको पूजा आराधनाका लागि सहजता होस् भन्ने उद्देश्यले दुर्गा स्थापनासहित पूजा, आराधनाको व्यवस्था गरिएको बताउनुभयो । डेरामा बस्नेले सबै व्यवस्था गर्न असहज हुने भएकाले चोकमा दुर्गाको आराधना सुरु गरिएको उनले उल्लेख गरे ।

डेढ दशकदेखि यहाँ फलफूल पसल सञ्चालन गरिरहेका दोलखाका रविप्रसाद काफ्लेले पुख्र्यौली थातथलो फर्कन नसक्नेका लागि यसले सहयोग पु¥याउने बताए । काठमाडौँको मुख्य बजारको चोकमा यसरी दुर्गा पूजा हुने पहिलो स्थान बनेको आफूले देखेको उनको भनाइ छ ।

कुपण्डोल र पशुपति क्षेत्रलगायत स्थानमा यसरी नै चोकमा दुर्गा स्थापना गरेर पूजा, आराधना गर्ने र स्थानीयलाई सहजीकरण गर्ने काम भइरहेको काउन्सिलका सचिव सुबोधचन्द्र साहले जानकारी दिए । बहालमा बस्ने सबैकामा दुर्गा पूजा गर्ने स्थान नहुने भएकाले यसले सबैलाई चाडपर्व मनाउन सहयोग गर्ने उनको भनाइ छ ।

चोकमा पूजा, आराधना गर्न आउनेको घुइँचो देखिन्छ । देवी भजन र स्तोत्रसँगै बेला बेलामा गुञ्जने मालश्री धुनले शरद् ऋतुमा पर्ने आनन्दमय दसैँको अनुभूति दिलाउँछ । स्थानीय मिथिला मानन्धरले दुर्गा उपासना सामूहिक रूपमा गर्न पाउँदा सहरी वातावरणमा एक्लिने समस्याबाट मुक्त भई सामाजिक र सांस्कृतिक परम्परा आदानप्रदान हुनुका साथै सबैसँग घुलमिल हुने वातावरण बनेको धारणा राखे ।