हामी सबैकाे संसारन्यूज

निर्वाचनको तयारीका विषयमा प्रधानमन्त्री र दलका नेताबीच आज छलफल

काठमाडौँ । प्रधानमन्त्री सुशीला कार्कीले आगामी फागुन २१ गतेका लागि तय गरिएको प्रतिनिधिसभा निर्वाचनको राजनीतिक वातावरण बनाउन आज दलका नेताहरूसँग छलफल गर्दै हुनुहुन्छ ।

प्रधानमन्त्री निवास बालुवाटारमा दिउँसो ४ बजे हुने उक्त छलफलका लागि विघटित संसद्मा प्रतिनिधित्व गरेका सात राजनीतिक दललाई औपचारिक निमन्त्रणासहित टेलिफोन सम्पर्क गरिएको प्रधानमन्त्री कार्कीका प्रेस संयोजक रामबहादुर रावलले जानकारी दिनुभयो । उहाँका अनुसार निर्वाचनको तयारीका क्रममा भइरहेका विभिन्न पहलहरूमध्ये यो छलफललाई एउटा महत्वपूर्ण प्रयासका रूपमा लिइएको हो ।

सरकारले हालसम्म निर्वाचनसम्बन्धी कानुनी, नीतिगत, पूर्वतयारी तथा सुरक्षा व्यवस्थाका विषयमा निर्वाचन आयोग र सुरक्षासम्बन्धी निकायसँग निरन्तर परामर्श गर्दै आएको छ । तर, राजनीतिक दलहरूसँग प्रधानमन्त्री कार्कीको यो पहिलो औपचारिक छलफल हो ।

छलफलमा नेपाली कांग्रेस, नेकपा (एमाले), नेकपा (माओवादी केन्द्र), राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टीलगायत दलका शीर्ष नेता सहभागी हुने जनाइएको छ ।

यसअघि राष्ट्रपति रामचन्द्र पौडेलको उपस्थितिमा गत असोज २४ गते राष्ट्रपति कार्यालय शीतल निवासमा राजनीतिक दलहरूसँग निर्वाचन तयारीका सन्दर्भमा प्रारम्भिक छलफल भएको थियो ।

त्यसपछि निर्वाचन आयोगले गत असोज ३० गते विघटित प्रतिनिधिसभामा प्रतिनिधित्व गरेका तथा स्थानीय तहमा कम्तीमा एक वडा सदस्य जितेका गरी २९ वटा दलहरूसँग छलफल गर्दै सरकारले दलहरूसँग सघन सम्वादमार्फत निर्वाचनको वातावरण बनाउनुपर्ने सुझाव पाएको थियो ।