हामी सबैकाे संसारन्यूज

काठमाडौं । नेपाल बीमा प्राधिकरणले सार्वजनिक गरेको गत आर्थिक वर्ष २०८२/८३ को असार मसान्तसम्मको तथ्याङ्कअनुसार नेपालमा सञ्चालित जीवन बीमा कम्पनी, लघु जीवन बीमा कम्पनी तथा वैदेशिक रोजगार म्यादी जीवन बीमा पुलमार्फत करिब २ खर्ब ५ अर्ब रुपैयाँ बराबर बीमाशुल्क संकलन भएको छ ।

तथ्याङ्कअनुसार जीवन बीमा कम्पनीहरूले मात्र करिब २ खर्ब रुपैयाँ, लघु जीवन बीमा कम्पनीहरूले करिब १ अर्ब २१ करोड रुपैयाँ तथा वैदेशिक रोजगार म्यादी जीवन बीमा पुलमार्फत करिब ३ अर्ब ३७ करोड रुपैयाँ बीमाशुल्क संकलन गरेका छन् ।

जीवन बीमा कम्पनीहरूले असार मसान्तसम्म १ करोड १८ लाख ५० हजार ३ सय ९१ सक्रिय बीमालेख कायम गरेका छन् भने लघु जीवन बीमा कम्पनीसहित यो संख्या १ करोड ६७ लाख ९२ हजार २३० पुगेको छ ।

नेपाल लाइफको सबैभन्दा ठूलो बजार

कम्पनीगत रूपमा नेपाल लाइफ इन्स्योरेन्स सबैभन्दा ठूलो जीवन बीमा कम्पनी बनेको छ । यो कम्पनीको बजार हिस्सा समग्र जीवन बीमा कम्पनीको करिब २७ प्रतिशत रहेको छ ।
त्यस्तै दोस्रो स्थानमा रहेको नेशनल लाइफको बजार हिस्सा करिब १२ प्रतिशत र तेस्रोमा रहेको लाइफ इन्स्योरेन्स कर्पोरेशन (नेपाल)को बजार हिस्सा करिब ११ प्रतिशत रहेको छ ।
हाल नेपालमा १३ वटा जीवन बीमा कम्पनी तथा तीन वटा लघु जीवनबीमा कम्पनी सन्चालनमा छन् ।

निरास अर्थतन्त्रमा बीमा क्षेत्रको आशाको संचार

नेपालको जीवन बीमा उद्योगले आर्थिक वर्ष २०८२/८३ को असार मसान्तसम्म करिब २ खर्ब पाँच अर्ब रुपैयाँको बीमाशुल्क संकलन गर्दै आफ्नो व्यवसाय विस्तारलाई निरन्तरता दिएको देखिन्छ । बजारमा नेपाल लाइफ, नेशनल लाइफ र लाइफ इन्स्योरेन्स कर्पोरेशन (नेपाल) को अग्रता कायम रहँदा अन्य कम्पनीहरूले पनि उल्लेख्य व्यवसाय गरेका छन् । सक्रिय बीमालेखको संख्या १ करोड ६७ लाखभन्दा माथि पुग्नुले जीवन बीमा सेवाप्रति नागरिकको पहुँच र सहभागिता क्रमशः विस्तार हुँदै गएको संकेत गर्दछ ।