हामी सबैकाे संसारन्यूज

काठमाडौं । जिल्ला प्रशासन कार्यालय, काठमाडौंमा हालै दर्ता भएको विशाल मिलन वैज्ञानिक योग नेपालले आफ्नो पहिलो परोपकारी कार्यक्रमअन्तर्गत अपाङ्गता भएका व्यक्तिलाई सहयोग गरेको छ।

संस्थाले बूढानीलकण्ठ नगरपालिका–१०, ज्योतिनगरस्थित अपाङ्ग अशक्त सेवा केन्द्रमा रहेका करिब २५ जना सहयोगापेक्षीलाई दिवा भोजन गराउनुका साथै संस्थाको लोगो अंकित सेतो टी–सर्ट वितरण गरेको हो।

कार्यक्रममा बोल्दै विशाल मिलन वैज्ञानिक योग नेपालका अध्यक्ष श्रीधर अधिकारीले संस्थाको पहिलो परोपकारी कार्यक्रम सेवा केन्द्रमा रहेका अपाङ्गता भएका व्यक्तिहरूसँग भेटघाट र सहयोगबाट सुरु गर्न पाउँदा खुसी लागेको बताए। उनले यो सहयोग सानो भए पनि आगामी दिनमा संस्थामार्फत यस्तै सामाजिक तथा परोपकारी गतिविधिलाई निरन्तरता दिने प्रतिबद्धता व्यक्त गरे।

परोपकारी कार्यक्रमपछि संस्थाका सदस्यहरूले कागेश्वरी मनोहरा नगरपालिका–१ मा अवस्थित कागेश्वरी महादेव धामको दर्शन तथा पूजा–अर्चना गरेका थिए। त्यस अवसरमा उनीहरूले सोही क्षेत्रमा रहेको शहीद पार्कको समेत अवलोकन गरेका थिए।

एकदिने परोपकारी तथा धार्मिक यात्रामा विशाल मिलन वैज्ञानिक योग नेपालका करिब ४० जना योगीजनको सहभागिता रहेको थियो। संस्थाले सामाजिक सेवा, धार्मिक तथा आध्यात्मिक गतिविधिलाई सँगसँगै अघि बढाउने उद्देश्यले आगामी दिनमा पनि विभिन्न कार्यक्रम सञ्चालन गर्ने जनाएको छ।