हामी सबैकाे संसारन्यूज

देवदह (रुपन्देही), ३ कात्तिक । रुपन्देही प्रहरीले झण्डै साढे १८ लाख रुपैयाँ बराबरका अवैध सामानसहित पाँच जनालाई पक्राउ गरेको छ ।

जिल्ला प्रहरी कार्यालय रुपन्देही तथा मातहतका टोलीले सोमबार विभिन्न स्थानमा गरिएको चेकजाँचका क्रममा भारतबाट भन्सार छली गरी ल्याइएका रु १८ लाख ४२ हजार मूल्य बराबरका सामान बरामद गरेको जनाएको छ ।

जिल्ला प्रहरी कार्यालयका सूचना अधिकारी प्रहरी नायव उपरीक्षक सुरज कार्कीका अनुसार बरामद गरिएका सामान आवश्यक कारबाहीका लागि भैरहवा भन्सार कार्यालय बेलहिया र राजस्व अनुसन्धान कार्यालय बुटवल पठाइएको छ ।

प्रहरीका अनुसार सिद्धार्थनगर नगरपालिका–४ बस्ने ५३ वर्षीय अलउदिन चुरिहार, सिद्धार्थनगर–६ बस्ने ५५ वर्षीय मिहाज अहमद, भारतको दिल्लीका ४८ वर्षीय सोहेब आलम, सोही स्थानका ५६ वर्षीय पवन अली र ३८ वर्षीय साहिद मलिकलाई सामानसहित नियन्त्रणमा लिइएको हो ।